Կրեմլում կարծում են, որ այժմ ժամանակը չէ պարզելու, թե ով է մեղավոր Լեռնային Ղարաբաղում հակամարտության սրման համար, այլ ավելի կարևոր է դադարեցնել ռազմական գործողությունները։ Այս մասին հայտարարել է ՌԴ նախագահի Վլադիմիր Պուտինի մամուլի քարտուղար Դմիտրի Պեսկովը:
«Ռուսաստանը ԵԱՀԿ Մինսկի խմբի համանախագահներից է, և, իհարկե, կարգավորման գործընթացում խաղում է միջնորդի դեր, և միջնորդելու իր պատրաստակամությունը շեշտել է տարբեր մակարդակներով։ Այժմ շատ կարևոր է առաջին հերթին դադարեցնել ռազմական գործողությունները և ոչ թե պարզել, թե ով է մեղավոր։ Ռուսաստանը միշտ հավասարակշռված դիրքորոշում է ունեցել: Հենց այդ դիրքորոշումն է Ռուսաստանին հնարավորություն տալիս օգտագործել իր ազդեցությունն ու ավանդաբար լավ հարաբերություններ պահպանել և՛ Հայաստանի, և՛ Ադրբեջանի հետ այս հակամարտությունը լուծելու համար», – ասել է Պեսկովը լրագրողներին։
Նա նաև նշել է, որ Մոսկվան կոչ է անում անհապաղ դադարեցնել ռազմական գործողությունները Լեռնային Ղարաբաղում և գործընթացը տեղափոխել քաղաքական և դիվանագիտական հարթակ։
Ըստ Պեսկովի՝ իրավիճակը շփման գծում Ռուսաստանի եւ այլ երկրների համար «լուրջ անհանգստության առիթ է դարձել»:
Կարդացեք նաև
«Իրավիճակի սրման առաջին պահերից Արտաքին գործերի նախարար Լավրովը կապի մեջ էր ինչպես Երևանի, այնպես էլ Բաքվի գործընկերների հետ: Բացի այդ, հայկական կողմի նախաձեռնությամբ, Պուտինը երեկ զրուցել է Հայաստանի վարչապետի հետ», – ասել է ՌԴ նախագահի խոսնակը և միաժամանակ բացառել այն տարբերակը, թե Լեռնային Ղարաբաղում իրավիճակի սրումը կանխամտածված հրահրվում է Ռուսաստանի վրա որևէ ազդեցություն ունենալու համար:
Պատրաստեց Վիկտորյա ԱՆԴՐԵԱՍՅԱՆԸ
