Երեկ «Լուսավոր Հայաստան» խմբակցության ղեկավար Էդմոն Մարուքյանն ասել էր, որ ինքը առավոտվա 8-ից նամակներ է գրում միջազգային կառույցներին: Այսօր ԱԺ-ում Մարուքյանին հարցրեցինք՝ կարո՞ղ է ձեր նամակները տեղ չեն հասնում՝ հաշվի առնելով միջազգային հանրության լղոզված արձագանքները ու հավասարության նշան դնելը, ի՞նչ արձագանքներ եք ստացել այդ նամակներին: Նա պատասխանեց. «Մեր նամակները տեղ են հասնում: Հուլիսյանի ժամանակ էլ են տեղ հասել՝ ատոմակայանի վրա հարձակման հետ կապված: Բայց սա ուրիշ աշխարհ է, այս աշխարհը այն մարդու իրավունքների աշխարհը չի, սա ուժեղների աշխարհ է ու աշխարհը հետեւում է՝ որ ազգը կարողանում էիր հողի վրա իր կյանքի իրավունքը, ինքնասիրությունը պաշտպանել, նրան էլ հարգում են: Ով չի կարողանում, ասում են՝ դե հիմա այդպես ստացվեց, ոչինչ, հետո լավ կլինի: Հիմա ի՞նչ պետք է անել՝ մեր իրավունքները պաշտպանել, ինչն էլ հենց հիմա անում ենք: Միեւնույն ժամանակ չեմ ուզում թերագնահատել այդ նամակների դերը: Դա միջազգային, այսպես ասած, սոուս է ստեղծում: Առաջինը՝ հաստատված փաստ է, որ առաջինը Ադրբեջանն է սկսել, առաջ ասում էին՝ կողմերն իրար վրա են գցում: Սա ի՞նչ է՝ միջազգային դիվանագիտական աշխատանքի արդյունք է»:
Մարուքյանը նաեւ նշեց, որ միջազգային փորձագիտական մակարդակում արձանագրված է, որ Ադրբեջանն է սադրանքի դիմել ու սկսել: Նա ասաց, որ ապրիլյան պատերազմի ժամանակ մարդու իրավունքների կոպիտ խախտումների հետ կապված փաթեթը պետք է նորից հանել մեջտեղ. «Փաստաթղթավորված այդ պրոցեսը, որ մեր ձեռքին կարող էր զենք դառնալ, այդպես էլ առաջ չգնաց ու դա է նաեւ պատճառը, որ Ադրբեջանի ռազմական հանցագործ էլիտան այդպես էլ շարունակում է իրեն անպատիժ զգալ, մենք իրավական որեւէ պրոցես չսկսեցինք: ՄԻԵԴ գործեր մուտքագրվեցին, որոնք անհատական մակարդակում էին, զոհերի հարազատների դիմումներն էին՝ իրավապաշտպանների աջակցությամբ, բայց պետական մակարդակով այդ իրողությունը չօգտագործեցինք: Եթե այսօր էլ անհետեւողականորեն լինենք, կշարունակվի նույնը: Ես կարծում եմ, որ հիմա ապրիլյան պատերազմի ժամանակվա դոսյեները պետք է հանվեն»:
Հռիփսիմե ՋԵԲԵՋՅԱՆ
