ԵԽԽՎ Խորհրդարանական վեհաժողովի նախագահ Գեորգի Ծերեթելին դատապարտել է Լեռնային Ղարաբաղի շփման գծի երկայնքով ռազմական գործողությունները և Հայաստանին ու Ադրբեջանին զսպվածության կոչ է արել՝ կանխելու համար հետագա մարտական գործողություններն ու մարդկային կորուստները։
«Ես երկու կողմին էլ կոչ եմ անում դադարեցնել մարտական գործողությունները՝ ի շահ քաղաքացիական բնակչության և վերականգնել ԵԱՀԿ Մինսկի խմբի համանախագահների հովանու ներքո բանակցությունները հակամարտության երկարաժամկետ լուծման նպատակով։ Ես խորապես մտահոգված եմ այս վերջին սրացման կապակցությամբ, հատկապես քաղաքացիական բնակչության շրջանում զոհերի մասին տեղեկությունների և տարածաշրջանային անվտանգության սպառնալիքի պատճառով։ Ինչպես այսօր հայտարարել են համանախագահները, կողմերը պետք է ձեռնարկեն բոլոր անհրաժեշտ միջոցները իրավիճակը կայունացնելու համար։ Քաղաքական լուծումն այլընտրանք չունի»,- ասել է Ծերեթելին։
ԵԽԽՎ ԽՎ գլխավոր քարտուղար Ռոբերտո Մոնտելան հավելել է, որ Վեհաժողովը շարունակելու է ծառայել որպես ֆորում Հայաստանի և Ադրբեջանի պատգամավորների համար։ «ԵԽԽՎ ԽՎ-ն պատրաստ է խորհրդարանական բանակցություններ վարել կողմերի միջև, եթե կողմերը դա պահանջեն։ Թեպետ Մինսկի խումբը ԵԱՀԿ հարթակ է, որտեղ այն վեճը վերջին հաշվով պետք է կարգավորվի, Վեհաժողովը կարող է համալրել այդ ջանքերը»,- ասել է նա։
Պատրաստեց Վիկտորյա ԱՆԴՐԵԱՍՅԱՆԸ
