2020 թ. սեպտեմբերի 27-ը հայոց պատմության մեջ կդառնա վճտորոշ սահմանագիծ: Թուրքիայի անթաքույց աջակցությամբ Ադրբեջանը, ոտնահարելով միջազգային իրավունքի իր իսկ ստորագրած սկզբունքները, Արցախի դեմ սահմանագծի ողջ երկայնքով սանձազերծեց ռազմական ագրեսիա՝ կիրառելով մարտական զենքի բոլոր տեսակները, մարտական գործողությունները հասան մինչև Հայաստանի սահմաններ: Արցախի խաղաղ բնակչության կյանքի իրավունքը հերթական անգամ վտանգի է ենթարկված, ունենք զոհեր, վիրավորներ խաղաղ բնակչության շրջանում, հրետակոծված հիվանդանոցներ, դպրոցներ, բնակելի տներ և ենթակառուցվածքներ: Արցախում և Հայաստանում հայտարարված է ռազմական դրություն:
«Ժառանգություն» կուսակցությունն իր անվարան աջակցությունն է հայտնում Արցախի և Հայաստանի Հանրապետությունների իշխանությանը՝ գերագույն գլխավոր հրամանատարությանը՝ կասեցնելու թշնամու ռազմական ագրեսիան և միջազգային հանրությանը տեղեկացնելու թուրք-ադրբեջանական հարձակման մասին:
«Ժառանգություն»-ը համոզված է, որ միջազգային հանրությունը, հատկապես ԵԱՀԿ Մինսկի եռանախագահությունը պետք է արդար և վճռական դիրքորոշում որդեգրի՝ կանխելու ադրբեջանական ագրեսիան, հակառակ դեպքում նրանք ևս պատասխանատվության իրենց բաժինն են ունենալու հայ ժողովրդի դեմ գործած ռազմական այս ոճրագործության մեջ, որը կարող է վերաճել ցեղասպանության: Հարավային Կովկասում լայնածավալ պատերազմը կարող է վերաճել մեծ աղետի: Միջազգային կառույցները հանձնառություն ունեն միասնական ջանքերով զսպելու Թուրքիայի և Ադրբեջանի նվաճողական քաղաքականությունը՝ հանուն համաշխարհային կայունության և խաղաղության: «Ժառանգությունն» արդեն դիմել է գործընկեր միջազգային կազմակերպություններին, սպասում ենք արձագանքի:
Հայ ժողովուրդն իր հազարամյակներ ձգվող պատմության ընթացքում շատ հարձակումներ ու պատերազմներ է տեսել, մենք ընկրկել ենք, բայց չենք պարտվել: Ազգերի իրավունքը ազատ և խաղաղ ապրելու այլընտրանք չունի, հաղթելու ենք: Հայաստանի Հանրապետությանը կոչ ենք անում ճանաչել Արցախի Հանրապետությունը և ռազմաքաղաքական պայմանագիր կնքել Արցախի հետ, այս հարցը «Ժառանգություն» բարձրացրել է դեռևս տասնամյակ առաջ, այսօր առավել քան պահն է մեր միասնության բոլոր մակարդակներում:
Կարդացեք նաև
«ԺԱՌԱՆԳՈՒԹՅՈՒՆ» ԿՈՒՍԱԿՑՈՒԹՅՈՒՆ
