«Այս պահին դեռ ընթանում են թեժ մարտեր ամբողջ նշված ճակատներով»,- «Արցախ» տեղեկատվական շտաբում հրավիրված մամուլի ասուլիսին հայտարարեց Արցախի Հանրապետության (ԱՀ) պաշտպանության նախարարի տեղակալ Արթուր Սարգսյանը:
Նա փաստեց՝ Ադրբեջանի Հանրապետության զինված ուժերը սեպտեմբերի 27-ին՝ առավոտյան ժամը 7-ի սահմաններում, հերթական ագրեսիան է ձեռնարկել Արցախի Հանրապետության նկատմամբ: Նա նշեց. «Ադրբեջանի Հանրապետության զինված ուժերը Արցախի Հանրապետության զինված ուժերին մարտակարգերին, մշտական տեղակայման վայրերին զորամասերի, ինչպես նաև խաղաղ բնակավայրերին, այդ թվում նաև քաղաքամայր Ստեփանակերտին, հասցրել են հրթիռահրետանային հարվածներ՝ օգտագործելով օդուժը, այդ թվում նաև հարվածային ԱԹՍ-ներ: Այնուհետև հակառակորդի հատուկ նշանակության ստորաբաժանումները մոտոհրաձգային և զրահատանկային ստորաբաժանումներն անցել են լայնածավալ հարձակման հարավային, հյուսիսային, հարավարևելյան ուղղություններով»:
Արթուր Սարգսյանը տեղեկացրեց՝ հակառակորդն ունի կենդանի ուժի և զրահատեխնիկայի մեծ կորուստներ ու մանրամասնեց. «Ճշտված տվյալներով՝ կիրառելով հակաօդային պաշտպանության միջոցները կարողացել ենք խոցել երեք ուղղաթիռ, շուրջ 20 ԱԹՍ, այդ թվում հարվածային, 30 տանկ և հետևակի մարտական մեքենաներ: Նախնական տվյալներով՝ ցավոք, ԱՀ զինված ուժերում նույնպես կան կորուստներ՝ 16 զոհ և հարյուրից ավելի վիրավորներ»:
Նա վստահեցրեց՝ ԱՀ պաշտպանության բանակի անձնակազմը, յուրաքանչյուր սպա և զինվոր իր առջև դրված մարտական խնդիրը կատարում է պարտքի բարձր գիտակցումով և պատասխանատվությամբ:
Կարդացեք նաև
Արթուր Սարգսյանը հավաստիացրեց. «Համոզված եմ ավելի քան, որ այս պայմաններում, այս ընթացքում մենք նույնպես կարողանալու ենք հակառակորդին պարտադրել, որ նա նորից աղերսի իր հերթական հրադադարն ու խաղաղությունը»:
Տաթև ՀԱՐՈՒԹՅՈՒՆՅԱՆ
