Արծրուն Հովհաննիսյանը հրատապ հրավիրված ճեպազրույցում ասաց, որ կոնկրետ կորուստներ ամփոփիչ տվյալներով չեն կարող ներկայացնել, որովհետեւ այս պահին դեռ մարտեր են ընթանում: «Բայց քանի որ մարտերն ինտենսիվ են, խոսել այն մասին, որ կորուստներ չունենք կամ չենք ունենա, մի քիչ ճիշտ չի լինի»,-ասաց նա:
Հավելեց, որ հայ-ադրբեջանական սահմանի ոչ ամբողջ երկայնքով է լարվածությունը. «Այսօր առավոտյան ադրբեջանական զինված ուժերի հրթիռահրետակոծության գործողությունների ընթացքում, որոնք հիմնականում ուղղված են Արցախի ուղղությամբ, նաեւ եղել են հարվածներ Վարդենիսի ուղղությամբ՝ ՀՀ տարածքին»:
Արծրուն Հովհաննիսյանը նշեց, որ ըստ հավաքված տարբեր տեղեկությունների՝ բացառությամբ մեկ-երկու ամենամեծ տրամաչափի հրթիռային միջոցների՝ մնացած բոլոր միջոցները Ադրբեջանը կիրառել է, կիրառել է նաեւ բանակային օդուժը, ավիառումբեր, ուղղաթիռներ, ինքնաթիռներ, ԱԹՍ-ներ եւ այլն:
Պատասխանելով լրագրողի հարցին՝ ասաց, որ զինված ուժերի հրամանատարությունը, երկրի ռազմաքաղաքական ղեկավարությունը վերահսկում է իրավիճակը, իրականացնում է զինված ուժերի լիարժեք եւ ամբողջական կառավարում.«Բոլոր այն զինատեսակները, որոնք նպատակահարմար կգտնվեն մարտական տվյալ իրավիճակում կիրառելու, մեր կողմից կկիրառվեն վստահաբար»:
Կարդացեք նաև
Արծրուն Հովհաննիսյանը շեշտեց, Ադրբեջանն ամեն ինչը նախապես պլանավորել էր մանրակրկիտ, քանի որ հնարավոր չէ մեկ օրում պլանավորել, եւ օրինակ, լրագրողին հասցնել առաջնագիծ ու տեղեկատվություն հրապարակել իրենց ԶԼՄ-ներով:
Քաղաքացիական բնակչության մասին էլ Արծրուն Հովհաննիսյանն ասաց, որ Արցախից կան որոշակի տվյալներ, զգալի ավերածություններ կան Արցախի բնակավայրերում, Ստեփանակերտում, ինչը կամփոփվի ավելի ուշ: Նա ԶԼՄ-ներին հորդորեց չշտապել որեւէ բան հրապարակելուց՝ զորքերի, զենքի, զինտեխնիկայի տեղաշարժի եւ այլնի մասին:
Գոհար ՀԱԿՈԲՅԱՆ
