Եվրոպայի խորհրդի գլխավոր քարտուղար Մարիա Պեյչինովիչ-Բուրիչը հայտարարություն է տարածել Լեռնային Ղարաբաղում իրավիճակի վերաբերյալ։
«Ես լրջորեն մտահոգված եմ Լեռնային Ղարաբաղի հակամարտության շուրջ ռազմական էսկալացիայի մասին լուրերից։ Ես մեր անդամ երկրներ Հայաստանին և Ադրբեջանին կոչ եմ անում պատասխանատվություն ցուցաբերել և անհապաղ դադարեցնել մարտական գործողությունները։
Եվրոպայի խորհրդին անդամակցելիս այս երկրները ստանձնել են հակամարտությունները խաղաղ ճանապարհով լուծելու պատասխանատվություն, և դա անպայման պետք է պահպանել»,- ասված է հայտարարության մեջ։
Մարիա Պեյչինովիչ-Բուրիչը նշել է, որ այս դժվարին իրավիճակում առաջին հերթին մտածում է քաղաքացիական բնակչության մասին, այդ թվում՝ կանանց, երեխաների և ծերերի, որոնք իրենց ավելի խոցելի են զգում, և նրանց մասին, որոնք հակամարտությունից ավելի շատ են տուժում։
Կարդացեք նաև
«Եվրոպայի խորհրդի անունից ես մեր երկու երկրների իշխանություններին կոչ եմ անում անել հնարավոր ամեն բան մարդկային կյանքերը պաշտպանելու և ռազմական հակամարտություններին չմասնակցելու համար։ Ոչ մի ջանք չպետք է խնայել էսկալացիան կանգնեցնելու համար։
Այս կապակցությամբ մենք մեր աջակցությունն ենք հայտնում ԵԱՀԿ Մինսկի խմբի համանախագահներին հակամարտության խաղաղ լուծում գտնելու հարցում անդամ երկրներին աջակցելու համար»,- ասված է հայտարարության մեջ։
Պատրաստեց Վիկտորյա ԱՆԴՐԵԱՍՅԱՆԸ
