«Ես մասնակցել եմ ՍԴ նախագահի ընտրությանը, բայց իմ քվեարկությունը գաղտնազերծելու ցանկություն չունեմ»,- ՍԴ աշխատակարգային նիստից հետո լրագրողների հետ ճեպազրույցում նշեց ՍԴ դատավոր Արևիկ Պետրոսյանը:
Ինչպես արդեն տեղեկացրել ենք, ՍԴ նախագահի թեկնածու Երվանդ Խունդկարյանը չընտրվեց ՍԴ նախագահ: Քվեարկությանը մասնակցել է 5 դատավոր, ձայները բաշխվել են երեք «դեմ», երկու «կողմ» հարաբերակցությամբ:
Դիտարկումներին, թե ուղղորդված գործողություններ էին տեղի ունենում ՍԴ-ում, Արևիկ Պետրոսյանն այսպես արձագանքեց. «Յուրաքանչյուր դատավոր իր դիրքորոշումն է արտահայտում, գուցե ունի իր համապատասխան հիմավորումները: Բոլորդ էլ տեսաք, թե ինչ երկար տեղի ունեցան այդ գործընթացները»:
Հարցին՝ ի՞նչ դիրքորոշում ունի աշխատակարգային նիստի տեսաձայնագրությունը հրապարակելու մասին, Արևիկ Պետրոսյանը պատասխանեց. «Ամբողջ գործընթացը տեսաձայնագրվել է: Ես սկզբունքային առարկություն չեմ ունեցել, շատ նորմալ եմ դիտարկել: Դա ՍԴ աշխատակազմի կողմից որպես արձանագրության համար հիմք հանդիսացող նյութ եղել է: Հանրայնացման հետ կապված հարցը կքննարկենք, կարծում եմ՝ համապատասխան ընթացակարգերով կներկայացնենք ձեզ»:
Կարդացեք նաև
Արևիկ Պետրոսյանն ասաց, որ չի պատրաստվում ինքնաառաջադրվել և իր թեկնածուն առաջադրել՝ որպես ՍԴ նախագահի թեկնածու:
Տաթև ՀԱՐՈՒԹՅՈՒՆՅԱՆ
