«Իրանի հետ ՀՀ-ի սահմանը ցանկացած պահի կարող է փակվել, եւ հիմնական պատճառը ՀՀ գործող իշխանության ապաշնորհ արտաքին քաղաքականությունն է, որը հանգեցրել է հետեւյալին՝ Իրանի հետ ճանապարհը, որը մեր կյանքի ճանապարհն է, ըստ էության, կարող է փակվել՝ Իրանի հանդեպ ՀՀ-ի իշխանության թշնամական պահվածքի պատճառով»,-«Հայելի» մամուլի ակումբում լրագրողների հետ հանդիպմանն այսօր նման համոզմունք հայտնեց «Ազգային անվտանգություն» կուսակցության նախագահ Գառնիկ Իսագուլյանը:
Հիշեցնենք, որ Իրանի նախագահ Հասան Ռոհանին ՀՀ անկախության տոնը շնորհավորել է երեք օր ուշացմամբ: Գառնիկ Իսագուլյանի համոզմամբ՝ եթե Իրանը որեւէ բան ուշացումով է անում, ապա դա պարտադիր կրում է որոշակի ուղերձ. «Որեւէ մեկը չասաց՝ ո՞րն էր պատճառը»:
Ըստ Իսագուլյանի՝ Հայաստանի իշխանության վերաբերմունքն Իրանի ղեկավարության հանդեպ թշնամական է, մինչդեռ եղել են ժամանակներ, երբ Իրանի հետ սահմանը Հայաստանի միակ ելքի ճանապարհն է եղել: «Հիմա պատկերացրեք, որ Իրանի հետ սահմանը երկու ամսով փակվի: Կկորցնենք Արցախը եւ Մեղրին»,-եզրափակեց բանախոսը:
Լուիզա ՍՈՒՔԻԱՍՅԱՆ
