«Էլ ի՞նչ անի Իլհամ Ալիևը, որ Հայաստանում հասկանան իր քաղաքականությունը»,- «Փաստարկ» մամուլի ակումբում լրագրողների հետ հանդիպման ընթացքում ասաց «Ընդդեմ իրավական կամայականության» հասարակական կազմակերպության գործադիր տնօրեն Լարիսա Ալավերդյանը։
Լարիսա Ալավերդյանն ընդգծեց, որ Թուրքիան և Ադրբեջանը ունեն ռազմավարական ծրագիր, որտեղ Հայաստանը խանգարող հանգամանք է։ Ըստ նրա, վերջին տարիներին Թուրքիան և Ադրբեջանը գործում են որպես երկու պետությունների միություն․ «Այն, որ նրանք դա դե յուրե չեն արել կամ կարող է դեռ առժամանակ չանեն որևէ մի ձևով՝ չպետք է մեզ մոլորության մեջ գցի։ Եթե հիշում եք, մինչև անգամ հայաստանյան որոշ վերլուծաբաններ գրում էին Ադրբեջանի և Թուրքիայի քաղաքականության տարբերության մասին այն, ինչ վերաբերում է հայությանը, մասնավորապես՝ Արցախի հարցին և Հայաստանին։ Անթույլատրելի միամտություն է։ Մենք պետք է լուրջ ընդունենք, որ մենք ունենք երկու հարևան պետություններ, որոնք որ դարեր շարունակ, իսկ հարյուր տարի առաջ այդպես էլ չկարողացան ավարտել ցեղասպանությունը Արևելյան Հայաստանում։ Նրանք բոլորովին չեն հրաժարվել այդ մտքից, խիստ հակառակը»։
Լարիսա Ալավերդյանը կարծում է, որ Ադրբեջանը ցանկանում է, որ իր խոսքի նշանակությունը ավելի մեծ լինի Հայաստանում, քան հայկական կողմինը․ «Թող չթվա, որ դա փոքր խնդիր է, օրինակ, ռազմական գործողությունների համեմատ։ Դա այդպես չէ։ Հենց հասարակության քայքայումը, հենց ամբողջական այս իրարամերժ հայտարարությունների ֆոնի վրա, որոնք հնչել են հենց նոր իշխանությունների կողմից՝ իրարամերժ, շատ վտանգավոր։ Մենք էլի հնարավորություն ունեցել ենք դրա մասին խոսել, նա ուզում է այդ անորոշությունը դարձնել զենք և պայթեցնել այդ հարցը ներսից, որ Հայաստանում համոզված լինեն, որ նոր իշխանությունը դրժել է, դա կարևոր է, բնութագիրը, թե տեսեք՝ ո՞վ է ձեր իշխանությունը, նրանք մեզ խոստացել են և դրժել են»։
Ամի ՉԻՉԱԿՅԱՆ
