«Մենք պատրաստ ենք տարբեր զարգացումների, սա չի նշանակում, որ մեր պայքարը դադարելու է»,- Երևանի ընդհանուր իրավասության դատարանի Կենտրոնի նստավայրի մոտ լրագրողների հետ զրույցում ասաց ԲՀԿ-ական ԱԺ փոխխոսնակ Վահե Էնֆիաջյանը:
Հիշեցնենք, այսօր կրկին քննարկվում է ԲՀԿ առաջնորդ Գագիկ Ծառուկյանի կալանքի հարցը:
Վահե Էնֆիաջյանն ասաց, որ իրենց պայքարում օգտագործելու են օրենքով սահմանված բոլոր միջոցները, ցանկացած որոշման դեպքում, անգամ եթե պարոն Ծառուկյանը կալանավորվի. «Մենք պետք է արձանագրենք, որ հանրահավաքների տենդենցը գնում է դեպի մեծացում՝ մարդկանց հոսքն ավելանում է»:
Անդրադառնալով Գագիկ Ծառուկյանի դեմ իրականացվող քրեական հետապնդմանը՝ Վահե Էնֆիաջյանն ասաց, որ այս գործով 100-ից ավելի մարդ է հարցաքննվել. «Կան բազմաթիվ մարդիկ, ովքեր չունեն լայն տարածում, բայց իրենց տարածքներում բնակչության մոտ հեղինակություն են վայելում: Բոլորին կանչում են հարցաքննության և բաց են թողնում, որովհետև ոչ մի խնդիր չկա: Ոչ մեկը չի խուսափում հարցաքննությունից: Հայաստանում չեղած տեղը 100-ից ավելի մարդ են կանչել հարցաքննության: Իմ անձնական տեսակետով, եթե ինչ-որ մեկը հակաօրինական գործունեություն է ծավալել՝ բնականաբար պետք է պատասխանատվության ենթարկվի»:
Կարդացեք նաև
Լրագրողների դիտարկումներին ի պատասխան՝ Վահե Էնֆիաջյանը հորդորեց իշխանությանը հարցնել, թե ԲՀԿ-ն ինչով է նրանց խանգարում. «Հունիսի 5-ի քաղաքական խորհրդի նիստից հետո սկսեցին հնչել հայտարարություններ և սկսեցին հետապնդումները: Սա քաղաքական ենթատեքստ ունի, իրականությունը վաղ թե ուշ ջրի երես է դուրս գալու»:
Վահե Էնֆիաջյանը նաև հավաստիացրեց, որ հոկտեմբերի 8-ին Ազատության հրապարակում ԲՀԿ-ի, ՀՅԴ-ի և «Հայրենիք» կուսակցության հրավիրած հանրահավաքը կայանալու է և ԲՀԿ-ի մոտ օրակարգային փոփոխություն չի եղել: «Հայրենիք և Դաշնակցություն կուսակցությունների հետ մեզ կապում է ստեղծված իրավիճակի դեմ միասին պայքարելը, խնդիրների լուծման ուղիները, կադրերի հարցում իշխանության ձախողումը: Չի կարող նախարարի կամ պատգամավորի կենսագրությունը 3 տող լինել: Պարտադիր չէ, որ անփորձին փոխարինի կաշառակերը»,- ասաց Վահե Էնֆիաջյանը՝ արձագանքելով լրագրողի դիտարկմանը, որ կա կարծիք՝ լավ է անփորձները կառավարեն, քան կաշառակերները:
Մամուլում տեղեկություններ եղան, որ ԲՀԿ-ական պատգամավորների, մասնավորաբար՝ Գևորգ Պետրոսյանի և Նաիրա Զոհրաբյանի նկատմամբ նույնպես քրեական գործեր են հարուցվելու: ԱԺ փոխխոսնակը հավաստիացնում է, որ որևէ հետապնդում իրենց չի կաշկանդելու:
Ինչ վերաբերվում է ՀՀԿ-ի՝ Եռյակի հանրահավաքին մասնակցելուն, ԱԺ փոխխոսնակն ասաց, որ ՀՀԿ-ի հետ հանրահավաք անելու հարց չեն քննարկել:
Նելլի ԳՐԻԳՈՐՅԱՆ
