8 ամսվա կտրվածքով կա մոտ 49 միլիարդ դրամի պակաս հարկային հավաքագրում եւ գնալով այս թիվը կաճի: Այսօր այս մասին հայտարարեց ՊԵԿ նախագահ Էդվարդ Հովհաննիսյանը: Կառավարության նիստից հետո պարոն Հովհաննիսյանը լրագրողների հետ զրույցում ասաց. «Տարբերությունը, ենթադրում ենք, որ գնալով կաճի, քանի որ 49 միլիարդ դրամի տարբերությունը 2019 թվականի համեմատելի ժամանակաշրջանի ու 2020 թվականի միջեւ բացասական տարբերությունն է»:
Էդվարդ Հովհաննիսյանն ասաց, որ ՊԵԿ-ն առաջիկայում կամփոփի 2020 թվականի երրորդ եռամսյակի ցուցանիշները եւ 9 ամիսների վերաբերյալ կներկայացնի հաշվետվություն՝ անդրադառնալով նաեւ հարկային հավաքագրումներին. «Ընդհանուր առմամբ, կառավարության կողմից համավարակի բացասական ազդեցության հետեւանքների պայմաններում գնահատված կատարողականների հավաքագրումը գտնվում է վերահսկողության ներքո ու կառավարելի է»:
Պարգեւավճարների վերաբերյալ հարցին ի պատասխան, Էդվարդ Հովհաննիսյանն ասաց, որ պարգեւավճարները շատ համահունչ են ու ճիշտ են գնահատված յուրաքանչյուր աշխատակցի կատարած աշխատանքով:
Հարցին՝ եթե պարգեւավճարներ չտրվեն ՊԵԿ աշխատակիցները լավ չե՞ն աշխատելու Էդվարդ Հովհաննիսյանը պատասխանեց. «Այսօր միայն աշխատավարձով աշխատակիցներին պահելը բավարար չէ ՊԵԿ աշխատակիցների արդյունավետ աշխատանքը կազմակերպելու համար»։
Կարդացեք նաև
Լուսինե ԲՈՒԴԱՂՅԱՆ
