«Հոգեկան առողջության պահպանման ազգային կենտրոն» ՊՈԱԿ–ում (Նուբարաշենի հոգեբուժարան) սեպտեմբերի 22-ից գտնվող Ա․Ղ․–ն (անձնական տվյալները չենք նշում–խմբ․) քիչ առաջ զանգեց խմբագրություն՝ տեղեկացնելով, որ իրեն դուրս են գրել կենտրոնից։ Նա շնորհակալ էր մեր կայքում երեկվա հրապարակման համար։
Հիշեցնենք, որ նա նշել էր, որ իրեն չափից դուրս ալկոհոլ օգտագործելու համար են տեղափոխել կենտրոնում եւ հաշվի չեն առնում իր իրավունքները, պարտադրում են հոգեմետ դեղեր սրսկվել, որոնց կարիքը չունի։
«Հրապարակումից հետո կտրուկ փոխվեց վերաբերմունքը։ Մինչեւ այսօր դուրս գրվելս կենտրոնից՝ ոչ մի դեղամիջոց չսրսկեցին։ Հոգեբուժական հանձնաժողովն էլ եզրակացրեց, որ առողջ եմ։ Շնորհակալ եմ Aravot.am-ին, նաեւ «Հանուն ազատության» նախաձեռնող խմբին՝ պատկան մարմիններին ահազանգս հասցնելու համար։ Եթե աղմուկ չբարձրանար, երեւի իմ հոգեկանն էլ խախտվեր»,–ասաց նա։
Ի դեպ, Ա․Ղ․–ն խնդրեց լրատվամիջոցներին ուշադրություն դարձնել նման հաստատությունների առօրյային։ «Ես նոր եմ բանտից դուրս եկել, բայց հավատացեք՝ էնդեղ հոգեբուժարանում ավելի վատ պայմաններ են»,–եզրափակեց Ա․Ղ․—ն։
Կարդացեք նաև
Արմեն ԴԱՎԹՅԱՆ
