«Կորոնավիրուսի համավարակի ընթացքում հայաստանյան ֆինանսական կազմակերպությունները վերջին մի քանի ամսում վերանայել են մոտ 1 միլիոն վարկային պայմանագիր՝ 1.5 տրիլիոն դրամ գումարային մնացորդով: Այդ վարկերի հասցեատերերն են մոտ 550 հազար ֆիզիկական անձինք եւ մոտ 17 հազար իրավաբանական անձինք»,-«Բարգավաճ Հայաստանի» նախաձեռնած՝ «Վարկերի եւ ժամկետանց այլ պարտավորությունների նկատմամբ տույժերի, տուգանքների եւ վարկային տոկոսադրույքների կիրառման, դրանց համաներման եւ այլ վարկային հիմնախնդիրները ՀՀ բանկային համակարգում» թեմայով խորհրդարանական լսումների ժամանակ այսօր հայտարարեց ՀՀ կենտրոնական բանկի փոխնախագահ Ներսես Երիցյանը:
«Նման վերանայումը հաճախորդների հանդեպ բարի կամքի ու գործընկերության լավագույն դրսևորումն է: Վերանայման ծախսերը կրել են ֆինանսական եւ բանկային կազմակերպությունների սեփականատերերը»,-նշեց Ներսես Երիցյանը:
Հիշեցնենք՝ ԲՀԿ-ն գտնում է, որ քաղաքացիներին հարկավոր է վարկային համաներում շնորհել:
«Եթե իրավիճակն ամբողջությամբ դիտարկենք, ապա ակնհայտ է, որ վարկային արձակուրդները չեն կարող երկար տեւել: Բայց եթե կենտրոնական բանկի խորհուրդը գնահատի, որ որեւէ կերպ խաթարվել է հավասարակշռությունը, ապա երբեք չի վարանի միջամտել եւ քաղաքացիների շահը պաշպանել»,-ընդգծեց Երիցյանը:
Կարդացեք նաև
Լուիզա ՍՈՒՔԻԱՍՅԱՆ
