Ղարաբաղյան խնդրի գոյության ամբողջ ընթացքում կողմերի առաջին դեմքերը հնարավորինս պահպանել են կոռեկտությունը եւ միմյանց անձնական վիրավորանք չեն հասցրել:
Սեպտեմբերի 19-ին Ադրբեջանի նախագահը հատեց այդ կարմիր գիծը եւ տեղական հեռուստատեսություններից մեկի եթերում վիրավորեց Հայաստանի վարչապետին. «Դու ո՞վ ես, որ մեզ հետ նախապայմաններով խոսես»:
Ճիշտ չէր լինի ասել, թե նա հոգեխանգարմունքի մեջ է կամ չի տիրապետում դիվանագիտական լեզվի նրբություններին: Այդ քայլին Ալիեւը գնացել է գիտակցված: Իհարկե, կարելի է ասել, որ տավուշյան եռօրյա մարտերը ծանր տպավորություն են թողել, եւ Ալիեւը, հրապարակավ Հայաստանի վարչապետին վիրավորելով, լուծում է ներքին վստահության վերականգնման խնդիր:
Բայց չէ՞ որ նրան լսում են ոչ միայն Ադրբեջանում, այլեւ Հայաստանում եւ ԵԱՀԿ Մինսկի խմբի համանախագահ երկրների մայրաքաղաքներում:
Կարդացեք նաև
Մանավանդ որ միջնորդներն Ադրբեջանի եւ Հայաստանի արտգործնախարարների հետ հանդիպելու նախաձեռնությամբ են հանդես եկել եւ բանակցությունների վերսկսման են ձգտում: Ի՞նչ հանդիպում կարող է կազմակերպվել, եթե Ադրբեջանի նախագահն ի լուր աշխարհի վիրավորում է Հայաստանի վարչապետին: Ընդ որում, նրա խոսքի ենթատեքստն այն է, որ Հայաստանը չի կարող նախապայմաններ առաջադրել: Այսինքն՝ ԼՂ կարգավորումը «պետք է տեղի ունենա բացառապես Ադրբեջանի պայմաններով»:
Բացառված չէ, որ դա հոգեբանական ճնշման փորձ է: Բայց որ մթնոլորտն ակնհայտորեն ավելի է լարվում՝ անառարկելի է:
Ի՞նչ է սպասվում: Ենթադրություններ անելիս, հավանաբար, պետք է հաշվի առնել նաեւ, որ ԵԱՀԿ Մինսկի խմբի համանախագահ երկրների ազդեցության մասին պատկերացումները չափազանցված են, եւ մի պահի նրանք, հնարավոր է, չկարողանան կառավարել իրավիճակը: Կամ՝ այլեւս չցանկանան: Ալիեւը վերջին շառլատանը չէ եւ եթե գնում է նման սրացման, ապա ինչ-որ հաշվարկներ, ամենայն հավանականությամբ, ունի:
Այս պահին կարելի է մի կանխատեսում անել. սեպտեմբերի 22-ին ծրագրված է Ադրբեջանի խորհրդարանի խոսնակի հանդիպումը ՌԴ արտգործնախարարի հետ:
Դա, ըստ երեւույթին, Ալիեւին մոսկովյան ուղերձ հղելու համար է կազմակերպվում: Ի՞նչ ազդակ է հղելու Ռուսաստանը: Հայաստանի վարչապետին հասցված վիրավորանքն Ալիեւի ուղերձն է նաեւ Մոսկվայի՞ն:
Վահրամ ԱԹԱՆԵՍՅԱՆ
«Առավոտ» օրաթերթ
23.09.2020
