«Խնդրում եք կառավարության, մեր ընդդիմադիր պատգամավորներին, իմքայլականներին չխանգարեն մեզ»,- ՀՀ ԱԺ-ի դիմաց Ամուլսարի շրջակա համայնքների բնակիչների ներկայացուցիչների բողոքի ցույցի ընթացքում հայտարարեց Գնդեվազ համայնքի բնակիչ Վիրաբ Հովհաննիսյանը:
Նա հորդորեց Ամուլսարի հանքի շահագործմանը դեմ արտահայտվող ցուցարարներին գալ, մտնել գյուղ, տեսնել, թե ինչ են մտածում բնակիչները ու ասաց. «Թող մտնեն գյուղ, տեսնեն՝ աշխատող մարդու հետ ինչ է կատարվում, նոր որոշեն՝ հետագայում ինչ են անելու: Կխնդրեի մեր ընդդիմադիր պատգամավորներին չխանգարեին, չֆինանսավորեին ցուցարարներին: Իբր բնապահպաններին իրենք ֆինանսավորում են, իրենք էլ այնտեղ կանգնում են: Ես երկու տարի չեմ աշխատել այդ հանքում, արդեն երեք միլիոնի պարտք ունեմ, իսկ իրենք երկու տարի առանց աշխատանք կարողանում են իրենց ընտանիքները պահել»:
Նա հավաստիացրեց՝ իրենք խնդիր չունեն «Լիդիան Արմենիայի» հետ:
Կարդացեք նաև
Գնդեվազ համայնքի բնակիչ Նարեկ Հովհաննիսյանն ասաց՝ իրենց ցույցի իմաստն այն է, որ որոշ ընդդիմադիր պատգամավորներ, անգամ ԱԺ «Իմ քայլը» խմբակցությունից փորձում են «օգտագործել համայնքի բնակիչներին և դիվիդենտներ քաղել: Ներկայացնում են՝ իբր համայնքի բնակչությունը դեմ է Ամուլսարին: Մեր անունն օգտագործում են»: Նա կոչ արեց այդ բնապահպաններին չներկայանալ իրենց անունից, չխոսել, թե իբր համայնքների բնակչությունը դեմ է հանքին:
Նա տեղեկացրեց՝ արդեն իսկ սկսվել են աշխատանքները Ամուլսարի հանքում. հարակից համայնքներից ունենք հարյուր աշխատակից, այս պահին իրականացնում են ներքին հարդարման, գույքագրման աշխատանքներ:
Ցուցարարներից Մխիթար Արշակյանն էլ ասաց. «Մասնագիտությամբ կենսաբան եմ, Գնդեվազ գյուղի բնակչությունն է աշխատում «Լիդիան Արմենիա» ընկերությունում: Մեր բնապահպաններին և պատգամավորներին կխնդրեի ուղղակի դիվիդենտներ չքաղել այս խառը վիճակում: Ուղղակի իրենք պղտոր ջրում ջուր են որսում: Կոնկրետ ես որպես կենսաբան 25 տարվա աշխատանքային փորձ ունեցող կասեի, որ ոչ մի բնապահպանական խնդիր գոյություն չունի: Եթե լիներ, ապա այդ 400 հազար դոլարը, որ ուսումնասիրել է ԷԼԱՐԴ-ը, կլիներ: Այդ թերությունները փոքր են, որոնք հեշտությամբ կարող են լուծել»:
Ցուցարարները նաև համայնքների բնակիչների անունից բաց նամակ հղեցին ՀՀ ԱԺ պատգամավորներին:
Տաթև ՀԱՐՈՒԹՅՈՒՆՅԱՆ
