ՍԴ դատավոր Արեւիկ Պետրոսյանն այսօր լրագրողների հետ զրույցում ասաց, որ որեւէ առաջադրում իր կողմից չի կատարվելու, նաեւ չի ինքնառաջադրվելու. «Այս պահի դրությամբ չկա թեկնածու, որն առաջադրված լինի: Տեսնենք ովքեր կառաջադրվեն, ինչ ելույթներ կունենան, ինչ տեսլական են պատկերացնում, ինչպիսի գնահատական կտան ստեղծված իրավիճակին, ինչպես կպատկերացնեն ստեղծված իրավիճակի հանգուցալուծումը, ըստ այդմ կլինեն նաեւ մոտեցումները»:
Հիշեցնենք, որ այսօր Սահմանադրական դատարանում աշխատակարգային նիստ է, որի օրակարգում Սահմանադրական դատարանի նախագահի ու փոխնախագահի ընտրության հարցն է:
Արեւիկ Պետրոսյանը նշեց, որ ՍԴ-ում որեւէ խնդիր չի եղել մինչեւ 2020-ի հունիսի 26-ը, երբ ուժի մեջ մտան սահմանադրական փոփոխությունները, մինչ այդ ՍԴ-ն իր բնականոն գործունեությունն է իրականացրել:
Հարցին՝ այս նոր կազմով ՍԴ-ն ավելի մե՞ծ վստահություն կունենա քաղաքացիների մոտ, քան նախկինը՝ Արեւիկ Պետրոսյանը պատասխանեց, որ գործունեության վստահության հետ կապված հարցերը համեմատության մեջ պետք է տեսնել, այդ նույն հարցերը թող տան հետո:
Կարդացեք նաև
Թե ինչ կարծիք ունի ՍԴ նորընտիր դատավորների մասին՝ Արեւիկ Պետրոսյանը պատասխանեց, որ որեւէ խնդիր չունի ու կոռեկտ չի համարում իր կարծիքն ասել: Նա ասաց, որ պետք է սպասել ու տեսնել՝ Հրայր Թովմասյանը կառաջադրվի՞. «Փաստն այն է, որ Հրայր Թովմասյանն իր պաշտոնավարման երկու տարիների ընթացքում իր գործունեությունն այնպես է իրականացրել, որ ՍԴ բնականոն գործունեության առումով որեւէ խնդիր չենք ունեցել, ստեղծվել են նորմալ մարդկային աշխատանքային փոխհարաբերություններ: ՍԴ-ն վերջին 2 տարիների ընթացքում գիտեք՝ ինչպիսի բարդագույն իրավիճակներում է եղել ու այդ ընթացքում մենք մեր մասնագիտական առաքելությունը, սահմանադրական արդարադատությունն իրականացնելու առումով իրականացրել ենք Հրայր Թովմասյանի պաշտոնավարման ժամանակահատվածում: Օգտվելով առիթից՝ ուզում եմ շնորհակալություն հայտնել պարոն Թովմասյանին՝ իր երկու տարիների ընթացքում ՍԴ նախագահի պարտականությունները, լիազորությունները բարձր մակարդակով իրականացնելու համար»:
Նա նաեւ շնորհակալություն հայտնեց ՍԴ երեք դատավորներին, որոնց լիազորությունները սահմանադրական փոփոխություններից հետո դադարեցվել են: Արեւիկ Պետրոսյանի խոսքով՝ նրանք պատշաճ մակարդակով են իրականացրել սահմանադրական արդարադատություն, հիմա զբաղվում են իրենց իրավունքների խախտմամբ. «Տեսնենք իրադարձությունները ինչպես կզարգանան: Կշարունակենք աշխատել՝ էլի շնորհակալությամբ ու գոհունակությամբ կշարունակեմ իմ գործընկերների հետ աշխատել, ոչ՝ կտեսնենք, կյանքը ինչ ցույց կտա»:
Հրայր Թովմասյանը չցանկացավ լրագրողների հետ խոսել, ասաց, որ ասելիք չունի ու մտավ ՍԴ:
Հռիփսիմե ՋԵԲԵՋՅԱՆ
