Բեռլինի «Շարիտե» հիվանդանոցում բուժում ստացող ռուս ընդդիմադիր քաղաքական գործիչ Ալեքսեյ Նավալնին սեպտեմբերի 22-ին դուրս է գրվել, հայտնում է հիվանդանոցի կայքը։
Ըստ տարածած հաղորդագրության՝ Նավալնին բուժում է ստացել 32 օր, որոնցից 24-ը՝ վերակենդանացման բաժանմունքում։ «Հաշվի առնելով հիվանդի ներկայիս վիճակը՝ բուժող բժիշկները կարծում են, որ լիակատար ապաքինումը հնարավոր է։ Ծանր թունավորման երկարաժամկետ հետևանքները հնարավոր կլինի պարզել հետագայում»,- ասված է հաղորդագրության մեջ։
Հիշեցնենք, որ Նավալնին իրեն վատ էր զգացել Տոմսկ-Մոսկվա չվերթի ժամանակ։ Ինքնաթիռը հարկադիր վայրէջք էր կատարել Օմսկում, որտեղ նրան անգիտակից վիճակում հոսպիտալացրել էին։ Օգոստոսի 22-ին նրան տեղափոխել էին Բեռլին։
Նավալնին 19 օր շարունակ կոմայի մեջ է եղել։ Գերմանիայի Բունդեսվերի հատուկ լաբորատորիան նմուշառում էր կատարել և Ալեքսեյ Նավալնու արյան մեջ հայտնաբերել «Նովիչոկ» տեսակի նյարդապարալիտիկ նյութերի խմբին պատկանող թույնի հետքեր։ Ավելի ուշ նման եզրակացության էին եկել նաև Ֆրանսիայի և Շվեդիայի լաբորատորիաները։
Կարդացեք նաև
Պաշտոնական Մոսկվան հերքում է բոլոր մեղադրանքները և Բեռլինին իրավական օգնության մասին մի քանի հայտ է ուղարկել։
Պատրաստեց Վիկտորյա ԱՆԴՐԵԱՍՅԱՆԸ
