«Անաֆիլակտիկ շոկ, կարող է տեղի ունենալ ցանկացած դեպքում, այն պրակտիկորեն կանխարգելվող չէ, մենք մեր պացիենտին թշնամին չենք, ուսումնասիրելով, որ հակաբիոտիկի այդ խմբից պացիենտը ալերգիա ունի, օգտագործել ենք մեկ այլ խմբի հակաբիոտիկ» ,- այսօր լրագրողների հետ զրույցում անդրադառնալով սեպտեմբերի 18-ին ծննդկան Սեդա Ասատրյանի մահվան դեպքին՝ ասաց Շենգավիթ բ/կ գլխավոր բժշկի տեղակալ Ռուսուդան Վարդանյանը:
Հիշեցնենք, որ մահացած ծննդկանը նախկինում վիրահատվել էր արտարգանդային հղիության կապակցությամբ: Հետվիրահատական շրջանում «Ցեֆտրիաքսիոն» հակաբիոտիկի նկատմամբ տարել է անաֆիլաքսային շոկ, որն ուղեկցվել է թոքերի այտուցով և սրտի կանգով: Առաջին անգամ կնոջը հաջողվել էր փրկել:
Մահացածի հարազատները պնդում են, որ ծննդաբերությունն ընդունած բժիշկ Աշոտ Սիրունյանը շատ հղիներ է ունեցել, հոգնած է եղել, ինչի հետեւանքով անփութության սխալ է թույլ տվել, իսկ Ռուսուդան Վարդանյանը հակադարձում է, որ դեպքի օրը Սիրունյանը երկու ծնունդ է ընդունել, ինչը մեծ ծանրաբեռնվածություն չէ:
Ըստ նրա՝ Սեդա Ասատրյանի ծննդաբերության գործընթացում բացթողումներ չեն եղել. «2000 թվականից աշխատում եմ Շենգավիթ բ/կ-ում, այդ թվականից մինչ այժմ, որ մայրական մահը տեղի ունենա հենց մեր կենտրոնի պատերում` իմ հիշելով, սա առաջին դեպքն է: Աշոտ Սիրունյանը մանկաբարձագինեկոլոգիական ծառայության տնօրենն է, որպես մանկաբարձ գինեկոլոգ՝ ես նրա ենթական եմ: Նա մի մասնագետ է, որի շնորհիվ լույս աշխարհ են եկել երեւի 10-15.000 երեխա»:
Կարդացեք նաև
Արփինե ՍԻՄՈՆՅԱՆ
