Մարտի 1-ի մայր գործի շրջանակում ՀՀ սահմանադրական կարգի տապալման համար մեղադրվողներ ՀՀ երկրորդ նախագահ Ռոբերտ Քոչարյանի, գլխավոր շտաբի նախկին պետ, 2008թ.-ի դրությամբ՝ Երեւանի կայազորի պետ Յուրի Խաչատուրովի, պաշպանության նախկին նախարար, 2008թ.-ի դրությամբ՝ ԶՈՒ ԳՇ պետ Սեյրան Օհանյանի, նախկին փոխվարչապետ Արմեն Գեւորգյանի գործով սեպտեմբերի 22-ի դատական նիստի ընթացքում նախագահող դատավոր Աննա Դանիբեկյանը որոշում կայացրեց հետաձգել ՀՀ երկրորդ նախագահ, Մարտի 1-ի գործով ամբաստանյալ Ռոբերտ Քոչարյանի պաշտպանական խմբի միջնորդության քննարկումը:
Հիշեցնենք՝ Ռոբերտ Քոչարյանի պաշտպան Հովհաննես Խուդոյանը և ՀՀ պաշտպանության նախկին նախարար Սեյրան Օհանյանի պաշտպան Կարեն Մեժլումյանը միջնորդել են դատարանին տրամադրել «մայր գործի» նյութերն ամբողջությամբ:
Աննա Դանիբեկյանը հայտարարեց. «Դատարանը գտնում է, որ դատավարության ներկա փուլում հնարավոր չէ անդրադառնալ մեղադրանքի հիմքում դրված փաստերին և դրանց վերաբերող ապացույցներին, նախքան այդ ապացույցների՝ պատշաճ ընթացակարգի շրջանակներում հետազոտելը դատաքննության ընթացքում: Այս փուլում հնարավոր չէ գնահատականներ տալ պաշտպանական կողմի միջնորդությունների հիմքում դրված փաստարկներին: Այդ պատճառաբանությամբ դատարանը որոշում է պաշտպանության կողմի միջնորդությունների լուծումը հետաձգել մինչ սույն քրեական գործում առկա բոլոր ապացույցների հետազոտումը»:
Տաթև ՀԱՐՈՒԹՅՈՒՆՅԱՆ
