«Եկել եմ ձեզ շնորհակալություն հայտնելու ձեր ակտիվ աջակցության համար: Դա և′ ուժ է հաղորդում, և′ տոկունություն, և′ ամեն ինչ»,- մինչ դատարան մուտք գործելը, Ռոբերտ Քոչարյանի ու մյուսների գործով դատական նիստի մեկնարկից առաջ ՀՀ երկրորդ նախագահ Ռոբերտ Քոչարյանը մոտեցավ դատարանի բակում հավաքված աջակիցներին և այսպիսի կոչով դիմեց:
Նա նաև հորդորեց արևի տակ չկանգնել ու չսպասել, այլ գնալ տուն և ասաց. «Այս անիմաստ դատը բավական երկար է տևելու ոչ միայն այսօր, այլև երկար ժամանակ: Ասել եմ՝ իմ օրացույցում երեքշաբթի օրը գոյություն չունի, ջնջված է. չեմ ուզում, որ նաև ձեր օրացույցում նույնը լինի»:
Աջակիցներից մի քանի կանայք գոչեցին՝ գիտենք, պատրաստ ենք մինչև վերջ:
Այնուհետև Ռոբերտ Քոչարյանն ասաց. «Ես կխնդրեմ այստեղ արևի տակ չկանգնել, ուղղակի գնալ տուն: Այս անիմաստ դատը մտել է ռուտինայի մեջ. երկար է տևելու, ձեր երեքշաբթի օրը մի ջնջեք ձեր օրացույցից, զբաղվեք ավելի կարևոր գործերով»:
Կարդացեք նաև
Աջակիցներն արձագանքեցին՝ մեր երեքշաբթի օր Ձեզ հետ միասին է: Քոչարյանը հորդորեց լավ լինել և հեռացավ:
Լրագրողների հարցին՝ մասնակցելո՞ւ է երեք ընդդիմադիր ուժերի` ՀՅԴ-ի, ԲՀԿ-ի, «Հայրենիք» կուսակցության՝ հոկտեմբերի 8-ի հանրահավաքին, Ռոբերտ Քոչարյանն այդպես էլ չպատասխանեց:
Հիշեցնենք, որ Ռոբերտ Քոչարյանը մեղադրվում է ՀՀ քրեական օրենսգրքի 300.1-ին հոդվածի 1-ին մասով. ըստ նախաքննական մարմնի՝ նա այլ անձանց հետ նախնական համաձայնությամբ տապալել է Հայաստանի Հանրապետության սահմանադրական կարգը:
Տաթև ՀԱՐՈՒԹՅՈՒՆՅԱՆ
