Յուրի եւ Արթուր Սաքունց եղբայրներն այսօր՝ Հայաստանի անկախության տոնի օրը, Երեւանի Շահումյան հրապարակում Գինեսի ռեկորդներ սահմանեցին:
Յուրին ձեռքերի վրա քայլելով, ատամներով բռնած ճոպանով մի քանի մետր տեղաշարժեց 4,5 տոննա կշռող Ջիփ ավտոմեքենան: Այս ռեկորդը սահմանելուց առաջ, նա լրագրողներին ասել էր, թե մտադիր է գերազանցել ադրբեջանցու ռեկորդը, որը յոթ տարի առաջ տեղաշարժել էր 1,5 տոննայանոց ավտոմեքենան:
Յուրայի կրտսեր եղբայրը՝ Արթուրը, բարելավեց սեպտեմբերի 2-ին Արցախի Հանրապետությունում սահմանած իր իսկ ցուցանիշը: Այն ժամանակ նա ատամներով բռնած ճոպանով 12 տոննա քաշ ունեցող ավտոբուսը տեղաշարժել էր 11 մետր: Իսկ այսօր Արթուրը նույնը կատարեց արդեն քաշելով 14 տոննա ընդհանուր կշռով երկու մեքենա:
Կարդացեք նաև
Եղբայրները լրատվամիջոցներին ասացին, որ ցանկանում են աշխարհին ցույց տալ հայաստանցու եւ արցախցու ուժը, Հայաստանի Հանրապետության եւ Արցախի Հանրապետության հզորությունը եւ հպարտ են, որ դա իրենց բազմիցս է հաջողվել:
Եղբայրները սպորտում բավականին բարձր ձեռքբերումներ են ունեցել: Յուրան, ինչպես ինքը նշեց, ուժային եռամարտիկ է, աշխարհի կրկնակի ու Եվրոպայի չեմպիոն: Նա նաեւ զբաղվում է մաս ռեսթլինգով: Իսկ Արթուրը սամբոյից աշխարհի բրոնզե մեդալակիր է, միջազգային մրցաշարերի հաղթող:
Սակայն եղբայրները նեղված էին ԿԳՄՍ նախարարությունից արժանացած արհամարհական վերաբերմունքից: Նրանց խոսքով, իրենք թե զանգերով, թե անձնապես տեղեկացրել են նախարարությանը, որպեսզի ներկա գտնվեն, սակայն մերժում են ստացել: «Մենք բողոքող տեսակ չենք, մենք ինչ-որ բան ուզող չենք: Մենք նախարարությունից ոչինչ չենք խնդրել: Ընդհակառակը, ես եմ մեքենա ծախել, որպեսզի կարողանամ մրցման մեկնել: Մենք ընդամենը ցանկանում էինք, որ նախարարությունից այսօր ներկայացուցիչ լինի»,- ասում էր Յուրի Սաքունցը:
Աշոտ ՀԱԿՈԲՅԱՆ
