Վարչապետ Նիկոլ Փաշինյանն այսօր Մատենադարանում, կառավարության անդամներին, ուսանողներին եւ աշակերտներին
ներկայացնելով մինչեւ 2050 թվականի ռազմավարությունն` ասաց, որ այսօր Հայաստանի նկատմամբ տարվում է տեղեկատվական պատերազմ, այդ թվում՝ Հայաստանի ներսում գտնվող հիմա արդեն հայտնի շրջանակների միջոցով: Նրա խոսքով. «Այսօր մեր հանրությունը շատ խոցելի է, կարող է մեկը դրսից հատուկ նպատակով ասել՝ Ղարաբաղը ծախել են, մեկը օտար երկրից, հավաստի աղբյուրից եւ Հայաստանում փոթորիկներ կբարձրանան»:
Անդրադառնալով ռազմավարության տեսլականին, պարոն Փաշինյանն ասաց, որ ռազմավարության մեգանպատակներից մեկը մեծ հայրենադարձությունը եւ ինտեգրումն է. «Սա մենք հասկանում ենք այսպես՝ ապահովել ավելի ու ավելի մեծ թվով հայերի կապվածությունը Հայաստանի հետ, որը կարտահայտվի ՀՀ քաղաքացիություն, ՀՀ-ում անշարժ գույք, բիզնես ունենալով, ՀՀ-ում կրթություն ստանալով»:
Վարչապետը ռազմավարության մեգանպատակներից համարեց նաեւ մաքուր եւ կանաչ Հայաստանի ապահովումը. «Ապահովել շրջակա միջավայրի համատարած զանգվածային պահպանությունն ու առողջացումը՝ բնական պաշարների սահմանափակ եւ պատասխանատու օգտագործումն ու ամբարումը՝ ի շահ հետագա սերունդների: Սա չի նշանակում, որ ՀՀ-ում հանքարդյունաբերություն չպետք է լինի: Սա նշանակում է, որ ՀՀ-ում լինելու է բարձր ստանդարտի հանքարդյունաբերություն: Այսօր ճգնաժամի պատճառով զբոսաշրջությունը գրեթե զրոյի է հավասարվել եւ եթե չունենայինք հանքարդյունաբերությունը, շատ խորը կոլապսի մեջ կլինեինք»:
Կարդացեք նաև
Լուսինե ԲՈՒԴԱՂՅԱՆ
