Այսօր «Էլեկտրամոբիլները Հայաստանում» նախաձեռնող խումբը եւ «Plug.am էլեկտրական մեքենաների խթանումը Հայաստանում» ծրագիրը առաջին անգամ կազմակերպեցին դեպի Գառնի էլեկտրական տրանսպորտի շքերթ՝ նվիրված Հայաստանի Անկախության տոնին:
«Մենք մի քանի ակտիվիստներով որոշեցինք Հայաստանի Անկախության օրը նշել այսպես՝ մեր էլեկտրամոբիլներով հավաքվել եւ մարդկանց ցույց տալ, որ էլեկտրամոբիլը ժամանակակից է եւ վախենալու չէ: Մենք արդեն տեւական ժամանակ էլեկտրամոբիլ ենք վարում եւ հորդորում ենք հանրությանը հետեւել մեր օրինակին, քանի որ էլեկտրամոբիլը բոլորիս ապագան է: Այն զրո արտանետում ունի, էկոլոգիապես մաքուր ու անաղմուկ է եւ շահագործման տեսակետից մատչելի փոխադրամիջոց է: Այս չափորոշիչները Հայաստանի, մասնավորապես, Երեւանի համար անչափ կարեւոր են եւ խնդրի լուծման, թերեւս, միակ օրինակն են»,-Aravot.am-ի հետ զրույցում ասաց MG Motor ընկերության մարքեթինգի պատասխանատու Հայկ Հարությունյանը, որը միշտ ունեցել է ավտոմեքենա եւ մոտ 1,5 տարի առաջ անցնելով էլեկտրամոբիլի՝ այլեւս իրեն չի պատկերացնում ներքին այրման շարժիչով մեքենայի ղեկին: «Էլեկտրամոբիլն իր հարմարավետությամբ, գաղափարով, հնարավորություններով միանգամայն այլ փորձառություն է»,- վստահեցնում է նա եւ ասում, որ մեկ լիցքավորումով հնարավոր է հաղթահարել մինչեւ 500 կմ՝ նայած, թե ինչ մեքենա է:
Հայկ Հարությունյանը ցավով նշեց, որ այսօր ամբողջ Հայաստանում կա էլեկտրամոբիլի լիցքավորման մոտ 15 կետ, ինչը շատ քիչ է եւ իր ունեցած տեղեկություններով՝ կառավարությունը դրանց թիվն ավելացնելու համար համապատասխան քայլեր չի ձեռնարկում: «Բայց կառավարությունը մի լավ քայլ արեց՝ ազատեց մաքսազերծումից, ԱԱՀ-ից»,-տեղեկացրեց մեր զրուցակիցը,- Ուրիշ առավելություն չկա: Մինչդեռ այլ երկրներում եթե էլեկտրամոբիլ ես գնում, պետությունը սուբսիդավորում է ընդհուպ մինչեւ 15-20 %»,-ասաց Հայկ Հարությունյանը:
Աշոտ ՀԱԿՈԲՅԱՆ
