ԲՀԿ խմբակցության քարտուղար Արման Աբովյանն այսօր ԱԺ-ում լրագրողների հետ զրույցում ասաց, որ իշխանությունները փաստարկներ չունեն Գագիկ Ծառուկյանի փաստարկված հայտարարություններին, անցնում են անձնական դաշտ. «Ինչ վերաբերում է այն ընթացքին, որը տեղի է ունենում, ոչ առարկայական, կիսաանձնական դաշտ մտնելով, անհասկանալի ինչ-որ արտահայտություններ, անհեթեթություններ, ցավոք, դա ցույց է տալիս քաղաքական մակարդակը»:
Արման Աբովյանն ասաց. «Գեւորգ Պետրոսյանը այսօր հայկական քաղաքական դիսկուրսի առաջին եռյակում է: Գործընթացները քաղաքական դաշտում պետք է լինեն քաղաքական, ավելորդ սրացումներ պետք չեն: Դրա հետ մեկտեղ գոյություն ունի քաղաքական դիսկուրսի մշակույթ: Երբ մենք արտահայտում ենք անհամաձայնություն կամ քննադատություն, նվազագույնը սպասում ենք կամ ադեկվատ հակադարձում, կամ քննարկում: Երբ որ դա չկա, նշանակում է կա՛մ չկա քաղաքական մշակույթ, կա՛մ ասելու եւ հակադարձելու բան չկա: Սրանով իշխանությունները վերահաստատում են Գագիկ Ծառուկյանի բոլոր քննադատական թեզերը»:
Հռիփսիմե ՋԵԲԵՋՅԱՆ
