Իշխող ուժն Ազգային ժողովում ապացուցեց, որ արդեն վաղուց կտրվել է հանրությունից, ժողովրդից ու, առհասարակ, իրականությունից, այլևս հակված չէ լսելու քաղաքացու ձայնը. ԱԺ-ում կրթության, գիտության, մշակույթի և սպորտի նախարար Արայիկ Հարությունյանին անվստահություն հայտնելու գործընթացի հարցի քվեարկության ավարտից հետո «Իրատեսի» հետ զրույցում ասաց «Լուսավոր Հայաստան» խմբակցության քարտուղար ԳԵՎՈՐԳ ԳՈՐԳԻՍՅԱՆԸ: Պատգամավորն ապշած է՝ բարձրագույն ղեկավարությունը դիրքորոշում ու կարծիք արտահայտող քաղաքացուն պատրաստ է խավարամիտ անվանելու, ասելու՝ գլուխը պատին է տալիս: Նման որակումները, ասում է, տեսել ենք՝ ինչով են ավարտվել: Ցավով է արձանագրում, որ հեղափոխությամբ իշխանության եկած թիմն այսքան շուտ փչացավ, այսքան շուտ մոռացավ այն արժեքներն ու արժեհամակարգը, որոնք քարոզելով եկավ իշխանության:
–Ազգային ժողովի փոխխոսնակ Ալեն Սիմոնյանն այն համոզմանն է, որ «17 պատգամավոր 17 համակիր չեք կարողանում հավաքել»:
-Ես չեմ զարմանում Ալեն Սիմոնյանի մաթեմատիկական հմտությունների բացակայության վրա, մինչև 100 նա երևի չի կարողանում հաշվել, գուցե մինչև 88 կամ 132 է հաշվում, բայց փաստ է, որ չի կարողացել հաշվել, թե քանի մարդ էր հավաքվել խորհրդարանի բակում: Նույն ձեռագիրն է, գործելաոճը՝ լրջագույն հարցի քննարկումը վերածել շոուի ու ֆարսի: Եվ դա բնական է, երբ հարցի վերաբերյալ ի վիճակի չեն գաղափարական բանավեճի մեջ մտնելու, ասելիք չունեն, բանավիճել չեն կարողանում, նման կերպ են վարվում: «Իմ քայլի» պատգամավորներից որևէ մեկը չկանգնեց ու չանդրադարձավ առկա խնդիրներին: Նրանք ամեն մի լուսավոր ու պայծառ բան պատրաստ են կրկեսի վերածելու:
–Ի՞նչ եք նախատեսում անել, այսքանով կավարտվի՞ պայքարն ընդդեմ Արայիկ Հարությունյանի, թե՞ արտախորհրդարանական ուժերի հե՞տ համագործակցելու:
Կարդացեք նաև
-Քննարկումներ ենք ունեցել, հայտարարել ենք, որ հավաքը բաց է ՀՀ յուրաքանչյուր քաղաքացու համար: Ինչ վերաբերում է հետագա անելիքներին՝ կարևորագույն խնդիր ենք դրել մեր առջև, այն է՝ ինչպես քաղաքացիներին առերեսել իրականության հետ, որովհետև այժմ հզոր քարոզչության միջոցով (թող ինձ ներեն մեր քաղաքացիները) իշխանությունները լվանում են մարդկանց ուղեղները: Քաղաքացիներին անընդհատ խաբում են, ու մենք պետք է այնպես անենք, որ ՔՊ-ն հաջորդ ընտրություններին այլևս չլինի իշխանություն, որովհետև կառուցված է ստի, խաբեության, մանիպուլյացիաների ու մարդկանց նուրբ զգացմունքների հետ խաղալու վրա: Այդ ամենը պետք է օր առաջ վերջ ունենա, իսկ մենք ամենօրյա աշխատանքով պետք է ցույց տանք, որ այն ամենը, ինչ ասվել է, իրականությունից հեռու է: Քաղաքացիները պետք է տեսնեն դա:
Զրույցը`
Սևակ ՎԱՐԴՈՒՄՅԱՆԻ
Հոդվածն ամբողջությամբ՝ «Իրատես» թերթի այսօրվա համարում:
