«Հանրակրթության չափորոշիչները մեծագույն բարեփոխում են հանրակրթության ոլորտում»,- «Արարատ» մամուլի ակումբում լրագրողների հետ հանդիպման ընթացքում ասաց Քաղաքացիական պայմանագիր կուսակցության հանրային կապերի համակարգող Վահագն Ալեքսանյանը։
Ըստ նրա, հենց այդ չափորոշիչներով է որոշվում, թե դպրոցը ինչպիսի քաղաքացի պետք է դաստիարակի․ «Ինձ համար ամենակարևոր կետերից մեկն այն է, որ այնտեղ շատ պարզ արձանագրված է, որ մենք պետք է ունենանք այնպիսի երեխաներ, որոնք մտածող լինեն։ Այսինքն՝ տրամաբանության զարգացմանը, մտքի զարգացմանը այնտեղ շատ մեծ տեղ է հատկացված։ Այսինքն՝ նախկին անգիր անելու մշակույթը փոխարինվում է մտածելու ունակությամբ։ Իհարկե՛, չի վերացվում նաև անգիրը, պոեզիան և այդ ամենը։ Այդ չափորոշիչների մեջ չկա այն ամենը, ինչի մասին անընդհատ բարձրագոչվում է՝ չկա սեռական դաստիարակություն, չկան ինչ-որ սեռական փոքրամասնություններ»։
Վահագն Ալեքսանյանը հավելեց, որ գիտական շրջանակները ազատ էին մասնակցել չափորոշիչները կազմելու գործընթացին, սակայն նրանցից ոչ ոք չի դիմել․ «Սոս Ավետիսյանը և Մարիա Կարապետյանը մասնակցել են թուրքական գիտական շրջանակների մի ծրագրի, որի արդյունքում թուրքական գիտական այդ շրջանակները ստորագրել են մի թեզի կամ փաստաթղթի տակ, որում ասվում է, որ Թուրքիայի դպրոցներում պետք է ուսուցանվի Հայոց ցեղասպանությունը։ Այո՛, նման բան արել են Մարիա Կարապետյանը և Սոս Ավետիսյանը, հիմա թե դրա մեջ ի՞նչ կա պախարակելի, ես չգիտեմ։ Ասում են՝ թուրք ու սպասում են, որ հիմա բոլորը դրոշները հանեն ու չլսեն շարունակությունը։ Ի դեպ, այդ խմբի հեղինակները, որոնց հետ աշխատել են Մարիա Կարապետյանը և Սոս Ավետիսյանը, նրանք Թուրքիայում ենթարկվել են որոշ հարձակումների նրա համար, որ մասնակցել են այդ ծրագրին, նրա համար, որ կողմ են եղել դպրոցներում Հայոց ցեղասպանության դասավանդմանը»։
Ամի ՉԻՉԱԿՅԱՆ
