«Ի՞նչ գործիքակազմով պետք է պարզվի՝ պաշտոնյան կապ ունի՞ քրեական ենթամշակույթի հետ»,-ԱԺ նիստում այսօր արդարադատության նախարար Ռուստամ Բադասյանից հետաքրքրվեց «Իմ քայլի» պատգամավոր Թագուհի Թովմասյանը:
Հիշեցնենք, որ առաջին ընթերցմամբ քննարկվում է կառավարության հեղինակած օրենսդրական փաթեթը, որով պաշտոնյաները 2 միլիոն դրամից սկսած ծախսերը պետք է հայտարարագրեն: Փաթեթը սահմանում է նաեւ, որ կոռուպցիայի կանխարգելման հանձնաժողովը հնարավորություն կունենա ստուգելու պաշտոնյայի՝ քրեական ենթամշակույթի հետ կապ ունենալու հանգամանքը:
Պատասխանելով պատգամավորի հարցին՝ փաթեթի զեկուցող Ռուստամ Բադասյանը նշեց. «Կոռուպցիայի կանխարգելման հանձնաժողովը կարող է դիմել իրավապահներին՝ օպերատիվ-հետախուզական գործողությունների միջոցով պարզելու երկու հանգամանք: Առաջինը գույքի փաստացի տիրապետումն է, երկրորդը՝ քրեական ենթամշակույթի հետ կապը: Քրեական ենթամշակույթի հետ կապի ստուգման նպատակով ստուգվելու է տվյալ անձի եւ ընտանիքի անդամների կապը՝ արդեն իսկ քրեական օրենսգրքով սահմանված «օրենքով գող» հասկացության անձանց հետ, անուղղակի շփումները, հեռահար հաղորդակցությունը, քրեական ենթամշակույթ կրողին որեւէ հարցով դիմած լինելու հանգամանքը: Դա, ինչպես պարզ է, կարող է ստուգվել բացառապես օպերատիվ-հետախուզական միջոցառումների ճանապարհով»:
Թագուհի Թովմասյանը նկատեց՝ պաշտոնյաները երբեմն լրագրողների հարցերին ի պատասխան վստահեցնում են, որ կապ չունեն քրեական ենթամշակույթի հետ, եւ այդ հանգամանքը պաշտոնյայի բարեխղճությանը թողնելը ճիշտ չէ: Բադասյանն արձագանքեց՝ այս օրենսդրական փաթեթը հենց այդ խնդիրը լուծելուն է միտված:
Կարդացեք նաև
Լուիզա ՍՈՒՔԻԱՍՅԱՆ
