«Լուսավոր Հայաստան» խմբակցության պատգամավոր Անի Սամսոնյանը ԱԺ-ում ԿԳՄՍ նախարար Արայիկ Հարությունյանի հրաժարականի իրենց պահանջին աջակցողների հետ ԱԺ դարպասների մոտ հանդիպման ժամանակ ասաց. «Հարցը բարձրացվել է նաեւ նրա համար, որ նախկինում գոյություն ունեցող վախի մթնոլորտը, երբ ծնողը վախենում էր ուսուցչից, ուսուցիչը՝ տնօրենից, տնօրենը՝ նախարարից: Վախի այս ամբողջական շղթան գործում է նաեւ այսօր: Եվ դա այն պատճառով, որ որեւէ բան չի արվել, որեւէ կամք չի ցուցաբերվել, որպեսզի այդ վախի շղթան դուրս գա: Եթե չլիներ վախի շղթան, վստահ եղեք՝ շատ ուսուցիչներ, շատ ուսանողներ, գուցե նաեւ՝ շատ աշակերտներ (երեխաներն էլ իրավունք ունեն իրենց բողոքն արտահայտելու), հաստատ այսօր այստեղ կլինեին:
Բոլորը վախենում են կորցնել իրենց աշխատանքը, ինչպես վախենում էին նախկինում: Սա ամենամեծ ցուցանիշն է՝ ասելու եւ հարց տալու. արդյո՞ք, բան է փոխվել: Ոչ, ոչինչ էլ չի փոխվել, ավելի է վատացել: Եվ դա կատարվել է մի մարդու պատճառով, որը կամք չի դրսեւորել այդ փոփոխությունները անելու: Որովհետեւ գործել է մի համակարգ, որը կոմֆորտի մեջ է պահել նախկին իշխանությանը: Հիմա ներկաները շատ հանգիստ տեղավորվել են այդ համակարգում եւ կիրառում են այն մեխանիզմները, որոնք կիրառում էին նախկինները»:
Աշոտ ՀԱԿՈԲՅԱՆ
