Ինչպես տեղեկացրել ենք, երկու օր առաջ Գյումրու «Պեգաս» խանութի մոտ դանակահարել էին 1998 թվականին ծնված երիտասարդի՝ Խ․Ս-ին, որին Գյումրի բժշկական կենտրոն էին տեղափոխել ձախ թևատակի կտրած-ծակած արյունահոսող վերքով ու վիրահատել էին։
Ոստիկանությունն այսօր իր պաշտոնական կայքում մանրամասներ է ներկայացրել դեպքից՝ տեսանյութ հրապարակելով ու նշելով, որ Գյումրու ոստիկանության «Կումայրի» բաժնի աշխատակիցները ժամեր անց բացահայտել են դանակահարությունը։
Պաշտոնական լուրի համաձայն, արդեն կա կասկածյալ, վերջինս 19 տարեկան է ու նախկինում երեք անգամ դատապարտված։
«Սեպտեմբերի 14-ին, ժամը 16.10-ի սահմաններում, շտապօգնության կայանից ոստիկանության Կումայրիի բաժին ահազանգ ստացվեց, որ կտրած-ծակած, արնահոսող վերքով Գյումրիի Մայակովսկու փողոցից հիվանդանոց է տեղափոխվել 22-ամյա մի երիտասարդ։
Կարդացեք նաև
Ոստիկանության Կումայրիի բաժնի քրեական հետախույզների ձեռնարկած անհետաձգելի միջոցառումներով պարզվեց, որ երիտասարդը ժամը 15-ի սահմաններում վիճաբանել էր Գյումրիի 19-ամյա մի բնակչի հետ, ինչի ընթացքում էլ սուր-կտրող-ծակող առարկայով ստացել էր վնասվածք։
Նույն օրը, մարմնական վնասվածք պատճառելու կասկածանքով, նախկինում 3 անգամ դատապարտված, 19-ամյա երիտասարդը բերման ենթարկվեց ոստիկանություն։
Դեպքի հանգամանքները պարզվում են։
Նախապատրաստվում են նյութեր»,-ընթերցում ենք ոստիկանության կայքում։
Նունե ԱՐԵՎՇԱՏՅԱՆ
