«Հուլիսին Ադրբեջանը լայնածավալ դիվերսիա կատարեց ՀՀ սահմանների հանդեպ, եւ հենց առաջին օրերին Թուրքիան զորակցեց Ադրբեջանին: Թուրքիան նույն ձեւով ամեն օր հայտարարում է, որ ոչնչացնելու է «Քրդական բանվորական կուսակցությանը», քուրդ ժողովրդին՝ անկախ նրանից, թե որտեղ են ապրում նրանք: Ամեն օր Թուրքիան մեծ թափով ցեղասպանություն է կատարում քուրդ ժողովրդի հանդեպ»,-ԱԺ նիստում այսօր հայտարարեց «Իմ քայլի» պատգամավոր, «Հայաստանի քրդական ազգային խորհուրդ» հ/կ խորհրդի նախագահ Կնյազ Հասանովը:
«Սիրիայի քրդական աղբյուրները դեռեւս ամիսներ առաջ են հայտարարել, որ Սիրիայում թուրքական իշխանություններն իրենց հովանու ներքո գտնվող իսլամիստ ահաբեկիչներին տեղափոխում են Ադրբեջան: Մենք դատապարտում ենք Թուրքիայի նման գործողությունները եւ զորակցություն հայտնում հայ ժողովրդին: 40 միլիոնանոց քուրդ ժողովրդի շրջանում կան հայերի բարեկամներ: Թուրքիայի մեջլիսի քուրդ պատգամավորները պարբերաբար բարձրաձայնել են հայոց ցեղասպանության հարցը եւ ենթարկվել մեծ ճնշումների»,-հավելեց Կնյազ Հասանովը:
Նա շեշտեց. «Հայ եւ քուրդ ժողովուրդներն ընդհանուր թշնամի ունեն՝ թուրքական իշխանությունը, եւ ժողովուրդները պետք է համագործակցեն, խոսեն կուսակցությունների մակարդակով»:
Լուիզա ՍՈՒՔԻԱՍՅԱՆ
