«Դուք իրո՞ք մտածում եք, որ մենք հակառակ բան ենք քարոզել՝ տարածելու համար համավարակը: Նայեք ֆեյսբուքյան էջս, որում կգտնեք հակադարձումներ նրանց հանդեպ, որոնք հայտարարում էին, թե կորոնավիրուս չկա: Ստիպված «բլոկել» եմ մի քանի քաղաքացիների, որովհետեւ անընդհատ դրանց վրա կենտրոնանալն արդեն նյարդերիս վրա էր ազդում»,-ԱԺ նիստում այսօր հայտարարեց «Լուսավոր Հայաստանի» պատգամավոր Սրբուհի Գրիգորյանը՝ դիմելով իշխող «Իմ քայլը» խմբակցությանը:
Հիշեցնենք, որ քննարկվում է կորոնավիրուսի դեմ պայքարի հարցում կառավարության եւ պարետատան աշխատանքի արդյունավետությունն ուսումնասիրող քննիչ հանձնաժողովի կազմը հաստատելու հարցը, եւ ԱԺ փոխխոսնակ Լենա Նազարյանը հայտարարեց՝ փաստեր է հավաքել այն մասին, թե ինչպես է ընդդիմությունը հակաքարոզչություն արել համավարակի առնչությամբ:
«Մեր խմբակցությունն անընդհատ քարոզել է պահպանել հակահամաճարակային կանոնները. ինչի՞ց եք վախենում: Եթե ամեն ինչ լավ է, կասենք՝ լավ է: Հնարավորություն տվեք քննիչ հանձնաժողով ստեղծելու»,-դիմելով «Իմ քայլին»՝ եզրափակեց Սրբուհի Գրիգորյանը:
«Բարգավաճ Հայաստան» խմբակցության պատգամավոր Նաիրա Զոհրաբյանն էլ նկատեց՝ եթե իշխանությունն իսկապես փաստեր ունի ընդդիմության դեմ, ապա հրաշալի է. «Դա առիթ է, որպեսզի դուք կողմ քվեարկեք հանձնաժողովի կազմին, եւ այն ստեղծվի: Այդպես մենք կքննարկենք բողոքի ցույցերի ժամանակ վարակվածների եւ «այո»-ի քարոզարշավի ժամանակ վարակվածների, կորոնավիրուսը «պինցետով եւ արաղով» ախտահանելու, մեր լեռնագնաց նախարարի հայտարարությունների, Գյումրիում մահացած տատիկի դիակի կորելու, կորոնավիրուսից մահացածի ատամնաշարը ջարդվելու հարցերը: Այո, կարող է պարզվել, որ ամեն ինչ լավ է, եւ պարետին ու առողջապահության նախարարին արիության մեդալ է պետք հանձնել…ու քանի որ ըստ ձեզ ես սուբյեկտիվ եմ, ես այդ հանձնաժողովում չեմ լինելու»:
Կարդացեք նաև
Լուիզա ՍՈՒՔԻԱՍՅԱՆ
