Վերահսկիչ պալատի նախկին նախագահ Իշխան Զաքարյանի ներկայացուցիչ Գեղամ Հակոբյանը տեղեկություններ չունի՝ ինչի համար էին այսօր Զաքարյանին հրավիրել ԱԱԾ: Թեեւ լրատվամիջոցներն ավելի վաղ գրել էին, որ Զաքարյանը բերման է ենթարկվել ԱԱԾ Գառնու տարածքում հիմնած այգու համար, Գեղամ Հակոբյանն այս տեղեկությունը չհաստատեց.
«Քանի որ դատավարական գործողություն չի եղել, ինքս չեմ մասնակցել, քրեական որեւէ գործի հետ կապ չունի , Զաքարյանը դատավարական կարգավիճակ չունի, ընդամենը հրավիրել են որոշակի հարցերի շուրջ բացատրություն տալու, իսկ բացատրություն տալը մարդու իրավունքն է, իրենք էլ, օգտվելով իրենց իրավունքից, հրաժարվել են, որեւէ գործողություն չի կատարվել»,- ասաց Գեղամ Հակոբյանը: Փաստաբանը նաեւ տեղեկություններ չուներ, թե արդյոք բացի Իշխան Զաքարյանից բացատրություն տալու են հրավիրվել նաեւ Զաքարյանի եղբայրն ու որդին:
Հիշեցնենք, որ հունիսի 14-ին Զաքարյանը կրկին հրավիրվել էր ԱԱԾ՝ ընտրակաշառքի հայտնի քրեական գործով հարցաքննության։ Այս գործով, Զաքարյանը կասկածյալի իրավունքներով վկայի կարգավիճակ ունի, փաստաբանի խոսքով, միայն այդ մի հարցաքննությունն է եղել, որի ընթացքում Զաքարյանը հայտնել է, որ առնչություն ու կատարվածի մասին տեղեկություններ չունի:
Արփինե ՍԻՄՈՆՅԱՆ
