«Բարգավաճ Հայաստան» կուսակցության նախագահ Գագիկ Ծառուկյանը Տավուշի մարզկենտրոն Իջեւանում ոստիկանության խիստ վերահսկողության ներքո ժողովրդի հետ հանդիպման ժամանակ հիշեցրել է, որ դեռ հունիսի 5-ին ԲՀԿ քաղխորհրդի նիստում է հայտարարել, որ չի կարելի ժողովրդին իր խնդիրների հետ միայնակ թողնել, հարկավոր է կանգնել ժողովրդի կողքին:
«Ժողովրդի վիճակը շատ ծանր է: Ես ցեխ չեմ շպրտել, չեմ քննադատել: Շփվել, տեսել եմ՝ համաճարակը, արտակարգ իրավիճակը մարդկանց ծայրահեղ վիճակի են հասցրել: Հարկավոր է, որ իշխանությունը կանգնի ժողովրդի կողքին, ժողովրդի կյանքով ապրի: Ասել եմ չորս-հինգ խնդիր՝ ամենակարեւորագույնները: Բյուջեի նպատակային օգտագործում է պետք եւ գումարի տեղերն էլ եմ ասում: Զգուշացրել եմ, որ 3-4 ամիս հետո ժողովուրդն էլ չի դիմանալու: Այսօր անցել է ընդամենը երկու ամիս՝ մարզերով քաղաքներով կառավարության դեմ ալիք է բարձրանում տարբեր ոլորտների շուրջ»,-ասել է ԲՀԿ առաջնորդը:
Գագիկ Ծառուկյանը, ըստ էության պատասխանել է նաեւ իշխանության այն քննադատություններին, թե չեն հասկանում, թե ինքն ինչ խնդիրների մասին է խոսում: «Այսինքն, ի՞նչը չեք հասկանում, եթե ասում եմ՝ մարդկանց բանկի տոկոսները ներեք վեց ամիս կամ մեկ տարի, ուսման վարձը մի բարձրացրեք: Ասում եմ՝ կորոնավիրուսի դեմ պայքար է ու կլինի դեղորայք, թե ստուգում, պետք է լինի անվճար: Այսօր երկրի պետական պարտքը $ 1 մլրդ. 400 միլիոնով ավելացրել եք: Որտե՞ղ է օգտագործվել այդ գումարը:
Իշխանության պատասխանատուները, նախարարները պետք է լինեն փորձառու մարդիկ, իրական կյանքը պետք է հասկանան, տիրապետեն ոլորտը, քարը՝ քարի վրա դնեն, որպեսզի ժողովուրդը իր վրա զգա: Ժողովուրդը կարող է դիմանալ, եթե իմանա, որ վաղը լավ է լինելու: Բայց այսօր դիմանալու բան էլ չի մնացել: Մարդկանց հողերն են տանում, տներն են տանում»,-իջեւանցիներին ասաց Գագիկ Ծառուկյանը:
Կարդացեք նաև
Աշոտ ՀԱԿՈԲՅԱՆ
