Այն քաղաքացիները, որոնք բանակում չեն ծառայել ու քրեական հետախուզման մեջ են, գտնվում են արտերկրում, 27 տարին լրանալու դեպքում կարող են վերադառնալ Հայաստան՝ վճարելով 2 տարվա պայմանագրային զինծառայողի աշխատավարձ՝ գումարած հավելավճարներ, որը կազմելու է նախնական հաշվարկներով՝ 5-5,5 մլն դրամ:
Այս մասին այսօր լրագրողների հետ զրույցում ասաց «Իմ քայլի» պատգամավոր Մխիթար Հայրապետյանը, որի համահեղինակությամբ օրենքի նոր նախագիծ է մշակվել: Հեղինակներից են նաեւ Արման Բաբաջանյանն ու Անդրանիկ Քոչարյանը:
2019-ի մարտից «Սահմանված կարգի խախտմամբ պարտադիր զինվորական ծառայություն չանցած քաղաքացիների մասին» օրենքն այլեւս չի գործում: Վերջին անգամ օրենքում փոփոխություն անելիս ու ժամկետը երկարացնելիս պայմանավորվածություն եղավ ու ամրագրվեց, որ դա վերջին անգամ է լինելու ու այլեւս հնարավորություն չեն տալու բանակում չծառայածներին փող մուծել ու համարել իրենց պարտքը տված: Գործող օրենքով, եթե բանակում չծառայածները գան ՀՀ, հայտնվելու են բանտում ու ենթարկվելու են քրեական պատասխանատվության:
Մխիթար Հայրապետյանն ասաց, որ ինքը այս ընթացքում հարյուրավոր նամակներ է ստացել, որ գտեք մի լուծում, իրենք էլ նման առաջարկ են արել: Ընդ որում, 5 մլն-ը ֆիքսած գումար չէ, եթե պայմանագրային զինծառայողի աշխատավարձը բարձրանա, այդ թիվն էլ կաճի: Երկրորդ տարբերակն այն է, որ կարող են վճարել, գալ ու զինծառայության անցնել 3 տարի՝ հետ ստանալով գումարը: Վաղեմության ժամկետը, որը սահմանված էր 37 տարի, որից հետո քրգործը կարճվում էր, նախագծով սահմանվում է 20 տարի: Այսինքն, մինչև 47 տարեկանը իրենց վրա տարածվելու է այս որոշումը:
Կարդացեք նաև
Կառավարության դիրքորոշումը դեռ հայտնի չէ:
Հռիփսիմե ՋԵԲԵՋՅԱՆ
