«Մեզ ասում են՝ միասնական թանկանալու է՝ 1,5-ից երկու անգամ: Բայց անգամ այդքանով թանկացումը մեզ համար կլինի ջախջախիչ: Իրենք էլ շատ լավ գիտեն, որ փոքր ու միջին բիզնեսն այսօր ամենախոցելի խավն է Հայաստանում»,-դժգոհեց առեւտրով զբաղվող քաղաքացիներից մեկը, որը մի քանի տասնյակ գործընկերների հետ այսօր կառավարության առաջ կրկին բողոքի ցույց էին անում:
Հագուստի եւ կոշիկի բիզնեսով զբաղվող քաղաքացիները սպասում էին կառավարության ներկայացուցիչների պատասխանին՝ ակնկալելով, որ ՊԵԿ-ը հետ կկանգնի այդ որոշումից՝ առնվազն մեկ տարի հետաձգելով մաքսազերծման գների բարձրացումը:
«Մեր ակնկալիքն այն է, որ նախկինի նման՝ 1 կիլոգրամը 3,25 ցենտին համարժեք դրամով մաքսազերծում իրականացվի, որպեսզի կարողանանք կորոնավիրուսի հետեւանքները գոնե մի փոքր շրջանցել, որպեսզի բիզնեսն ամբողջությամբ չկործանվի Հայաստանում: Եթե մաքսազերծենք նոր կարգով, լուրջ խնդիրների առաջ կկանգնենք: Հուսանք, որ նիստն ավարտվի` մեզ կմոտենան եւ կհայտնեն՝ ինչ են որոշել: Մեզ ասում են, որ միասնական թանկանալու է՝ 1,5-ից երկու անգամ: Բայց անգամ այդքանով թանկացումը մեզ համար կլինի ջախջախիչ: Իրենք էլ շատ լավ գիտեն, որ փոքր ու միջին բիզնեսն այսօր ամենախոցելի խավն է Հայաստանում»:
Առեւտրով զբաղվող քաղաքացիների խոսքով, եթե նախկին կարգով վճարում էին, 1 կիլոգրամի համար 3,25 դոլարին համարժեք դրամ, հիմա վճարելու են երկու անգամ ավել, մոտ 6,5 ու կես դոլարին համարժեք դրամ` գումարած փոխադրման ծախսը. «Սա ի՞նչ է նշանակում խթանե՞լ բիզնեսը, նպաստե՞լ բիզնեսին, թե՞ կորոնավիրուսի տնտեսական հետեւանքները բարելավել»:
Կարդացեք նաև
Քիչ առաջ կառավարության շենքը պահպանող ոստիկաններից մեկը ցույցի մասնակիցներին հայտնեց, որ կառավարության ներկայացուցիչները պատրաստ են երեք հոգու ընդունել եւ լսել նրանց: Առեւտրով զբաղվողներն ասացին, որ իրենց պահանջը հստակ է՝ մեկ տարի հետաձգել մաքսազերծման փոփոխությունը: Նրանց խոսքով, եթե ընդառաջ չգնան, շարունակելու են բողոքի ցույցերը:
Հիշեցնենք, որ այս տարվանից, ԵԱՏՄ կանոնակարգերով պայմանավորված, ներմուծվող ապրանքների մաքսազերծումը մի քանի անգամ թանկացել է: ՊԵԿ-ի պատճառաբանմամբ կիրառում են հսկիչ գներ:
Սեպտեմբերի 9-ին բիզնեսի ներկայացուցիչները հանդիպել են նաեւ ՊԵԿ ղեկավարի տեղակալին:
Լուսինե ԲՈՒԴԱՂՅԱՆ
