Ազգային ժողովն այսօր քննարկում է ՍԴ դատավորի ընտրության հարցը. դատավորների ընդհանուր ժողովը սահմանադրական դատարանի դատավորի պաշտոնում առաջադրել է վճռաբեկ դատարանի գործող նախագահ Երվանդ Խունդկարյանի թեկնածությունը, եւ պատգամավորները մինչեւ քվեարկելը հարցեր են հղում նրան:
«Դուք եւ ձեր որդիներն ապրում եք Երեւանում: Ձեր որդիներից մեկը ժամկետային զինծառայությունն անցկացրել է Երեւանում, իսկ մյուս որդին, ինձ հասած տեղեկություններով՝ այժմ արտոնյալ պայմաններում է ծառայում եւ դիրքեր չի բարձրանում: Ինչպե՞ս է ստացվել, որ ապրելով Երեւանում՝ ձեր որդին ծառայել է Երեւանում»,-հետաքրքրվեց «Իմ քայլի» պատգամավոր Թագուհի Թովմասյանը:
Երվանդ Խունդկարյանը պատասխանեց. «Ինձ ճանաչողները գիտեն իմ բնավորությունը եւ վարքագիծը նաեւ ընտանիքիս անդամների հարցում: Ավագ որդիս ծառայել է պատվո պահակախմբի համապատասխան ստորաբաժանումում: Երկրորդ որդիս հիմա ժամկետային զինծառայությունն անցկացնում է ՀՀ տարածքում տեղակայված զորամասերից մեկում: Նա ծառայությունն իրականացնում է նույն սկզբունքով, ինչ բոլոր զինվորները: Ներկա պահին՝ ամիս ու կես, որդիս դիրքերում է, այնպես որ՝ ձեր տեղեկատվությունն իրականությանը չի համապատասխանում: Որդիս, նաեւ՝ ավագ որդիս, որեւէ արտոնություն չի ունեցել: Ավագ որդուս ծառայության վայրը որոշելուն որեւէ միջամտություն չեմ ունեցել եւ չէի կարող ունենալ: Ինձ անգամ թույլ չէի տա»:
Լուիզա ՍՈՒՔԻԱՍՅԱՆ
