«Լրագրողներն ինձ հարցնում են, թե ՍԴ դատավորների թեկնածուների հետ ինչու չենք հանդիպում: Ասում եմ՝ չեն դիմել, որ հանդիպենք: Կուզենայի իմանալ՝ ինչո՞ւ չեն կազմակերպվում խմբակցությունների հետ հանդիպումները»,-ԱԺ նիստում այսօր խորհրդարանի նախագահ Արարատ Միրզոյանից հետաքրքրվեց «Լուսավոր Հայաստան» խմբակցության ղեկավար Էդմոն Մարուքյանը: «Այդ պրակտիկան էլ վերացավ: Փոխանակ գնալով ավելի լավ լինի, ավելի վատ է լինում: Ցանկացած մարմնի թեկնածուի հետ խմբակցությունները հանդիպում էին վերջինիս կամ նախաձեռնող մարմնի առաջարկով: ԱԺ նախագահին դիմե՞լ են՝ նման հանդիպում կազմակերպելու համար»,-հարցադրումը շարունակեց նա:
«Տրամագծորեն հակառակ կարծիքն ունեմ, գնալով ամեն ինչն էլ լավանում է, հատկապես՝ թեկնածուների, թափանցիկության եւ խմբակցությունների հետ քննարկումների առումով»,-արձանագրեց Արարատ Միրզոյանը, ապա տեղեկացրեց,-«ոչ խմբակցությունների, ոչ թեկնածուների կողմից նման նախաձեռնություն չի եղել, եւ ցանկացած նման նախաձեռնության դեպքում ԱԺ նախագահն ու աշխատակազմը կանեն ամեն ինչ, որ տեղ եւ ժամ ապահովեն: Ցավոք, հավանաբար, իմպերատիվ ընթացակարգ չկա նման հանդիպումներ կազմակերպելու, հետեւաբար՝ ԱԺ նախագահն ու աշխատակազմն առաջնորդվել են կողմերի ցանկություններով, որոնք տվյալ դեպքում բացակայել են»:
Լուիզա ՍՈՒՔԻԱՍՅԱՆ
