«Սպարապետի օրվա» առիթով այսօր Սյունիքի մարզ մեկնած վարչապետ Նիկոլ Փաշինյանը շրջեց նաեւ Հին Գորիսի փողոցում, որը վերակառուցվում է՝ որպես զբոսաշրջային գոտի ու պատմամշակութային կենտրոն: Փաշինյանը հարցուփորձ արեց աշխատանքների ընթացքից: Գորիսի քաղաքապետ Առուշ Առուշանյանն ասաց, որ վերանորոգել են Գորիս գյուղի, որը հին Գորիսն է, եկեղեցին, որը 4-րդ դարի է, մեկ այլ տաճար էլ հենց այդպես պահպանել են, որպես հեթանոսական: Քաղաքապետը նաեւ ասաց, որ ամբողջ կենտրոնի կոյուղագծերը փոխվում են, փողոցին հարակից հյուրանոցներ են կառուցվում:
Նիկոլ Փաշինյանը տեսնելով բնակիչների հին տների երկաթե դարպասներն ասաց՝ «Որ զբոսաշրջությունը մի քիչ աշխուժանա, մարդկանց կքաջալերենք դարպասները փայտից անեն, որ հնաոճությունը պահպանվի»:
Ի պատասխան, վարչապետին ուղեկցող տարածքային կառավարման եւ ենթակառուցվածքների նախարար Սուրեն Պապիկյանն ասաց, որ հենց այդպես էլ անում են: Գորիսի քաղաքապետը նաեւ ասաց, որ այդ տարածաշրջան այցելած զբոսաշրջիկը հիմնականում գիշերում է Գորիսում. «Հետո գնում են Խնձորեսկ, Արցախ՝ նորից գալիս գիշերում Գորիսում»:
Կարդացեք նաև
Քաղաքապետը մարզադաշտի նախագիծն էլ ցույց տվեց եւ այն տարածքը՝ որտեղ պետք է լինի ֆուտբոլի դաշտը: Նշեց, որ եկող տարի էլ այդ նախագիծն են կյանքի կոչելու:
Փաշինյանի հարցին՝ Սովետի տարիներին Գորիսն ունեցե՞լ է ֆուտբոլի թիմ, մարզի պաշտոնյաներն ասացին, որ «Զանգեզուր» ֆուտբոլի թիմ է եղել: Սուրեն Պապիկյանն էլ մատնանշելով Սյունիքի մարզպետ Հունան Պողոսյանին ասաց, որ նա էլ հավաքականում խաղացել է:
Լուսինե ԲՈՒԴԱՂՅԱՆ
