«Երբ ուսումնասիրում ենք չափորոշիչները, կարող ենք արձանագրել, թե դրանցում ռեֆլեքսիվ մտածողության միջոցով ինչ է ձևավորվում երեխաների մոտ, մասնավորապես՝ կարողանալ տեսնել սեփական ցանկությունները, հակումները, ճանաչել ցանկությունները, ձգտումները: Բայց հայտնի է, որ երբ մարդը գիտակցում է իր հակումը, ցանկությունը, այդ գիտակցումն ու ցանկությունն ավելի մեծ ուժ են ստանում եւ այդ տարիքում կարող են դառնալ կայուն հատկանիշ»,-«Ազգային օրակարգ» կուսակցության նախաձեռնած՝ հանրակրթական չափորոշիչների և առարկայական ծրագրերի վերաբերյալ քննարկման ժամանակ այսօր հայտարարեց բժիշկ-սեքսոլոգ Նարինե Ներսիսյանը:
«Վերոնշյալ վտանգը կա: Այն սեռային ինքնության վրա կարող է թողնել դրամատիկ ազդեցություն: Նկատի ունեմ այն, որ մենք կարող ենք ունենալ նույնասեռ անձնավորությունների, եթե ոչ աճ, ապա երևույթի տարածում, հոմոսեքսուալ, տրանսգենդեր անձանց, այսպես ասած, ոչ կենսաբանական սեռի վրա հիմնված սեռականություն»,-շեշտեց Նարինե Ներսիսյանը:
Հիշեցնենք, որ ՀՀ կրթության, գիտության, մշակույթի և սպորտի նախարարությունը հանրային քննարկման է ներկայացրել «Հանրակրթության պետական չափորոշչի ձևավորման և հաստատման կարգի» նախագիծը, որի վերաբերյալ թիրախային խմբերի հետ պարբերաբար անցկացվում են առցանց հանդիպումներ:
Լուիզա ՍՈՒՔԻԱՍՅԱՆ
