«Չափորոշիչներում «Ես և շրջակա աշխարհը» առարկայի դասագրքում Ստամբույլան և Լանզարոտեի կոնվենցիաներից որոշ սկզբունքներ են մտել, ընդ որում՝ շատ քողարկված ձևով»,-«Ազգային օրակարգ» կուսակցության նախաձեռնած՝ հանրակրթական չափորոշիչների և առարկայական ծրագրերի վերաբերյալ քննարկման ժամանակ այսօր հայտարարեց Խաչատուր Աբովյանի անվան մանկավարժական համալսարանի մանկավարժության ամբիոնի վարիչ Աիդա Թոփուզյանը։ Նրա խոսքով՝ մասնավորապես տարրական դասարանների համար կա չափորոշիչ՝ իմանալ կանանց և տղամարդկանց իրավահավասարության մասին, պահպանել համակեցության կանոններ:
«Խնդիրն այն է, որ չափորոշիչներից որեւէ մեկը չափելի չէ: Բառակույտ է: Ո՞նց են չափելու այս չափորոշիչը։ Անմիջապես հասկացվում է, որ թարգմանված բաներ են։ Երեխաների ի՞նչ գործն է իմանալ կանանց և տղամարդկանց իրավահավասարության, բռնության կամ հալածանքի մասին»,-հարցադրում արեց Աիդա Թոփուզյանը, ապա չափորոշիչների հեղինակներին կոչ արեց թողնել, որպեսզի երեխաները մեծանան. «Հետո նոր կորոշեն մնացած ամեն ինչը։ Չի կարելի գրքերում խցկել ամեն բան, ինչն ընդունելի է օտարերկրացի փորձագետների համար»:
Որպես մեկ այլ խնդիր տիկին Թոփուզյանը շեշտեց, որ
«Կենսաբանություն» առարկայում «Մաթեմատիկա» և «Հայոց լեզու» առարկաների միջառարկայական կապերի պահանջներ կան. «Մասնավորապես, «Մաթեմատիկայից» երեխաները պետք է կանանց վերարտադրողական ցիկլի տվյալները ներկայացնեն գրաֆիկով: Բա մասնագետը նման բան կգրի՞»:
Կարդացեք նաև
Լուիզա ՍՈՒՔԻԱՍՅԱՆ
