«Այս երկար քննարկումներում մեկ դրական բան կա: Կարծես թե առաջին անգամ է, որ կրթական չափորոշիչների հարցում այսքան բուռն ասելիք եւ քննարկման նյութ կա: Հանրության տարբեր շերտեր սկսեցին դրական եւ բացասական կողմեր տեսնել չափորոշիչներում»,-«Ազգային օրակարգ» կուսակցության նախաձեռնած՝ հանրակրթական չափորոշիչների և առարկայական ծրագրերի վերաբերյալ քննարկման ժամանակ այսօր հայտարարեց Մայր աթոռ սուրբ Էջմիածնի Քրիստոնեական դաստիարակության կենտրոնի տնօրեն հայր Զաքարիա վարդապետ Բաղումյանը:
Հիշեցնենք, որ ՀՀ կրթության, գիտության, մշակույթի և սպորտի նախարարությունը հանրային քննարկման է ներկայացրել «Հանրակրթության պետական չափորոշչի ձևավորման և հաստատման կարգի» նախագիծը, որով «Հայ եկեղեցու պատմություն» առարկան միավորվելու է «Հայոց պատմությանը»:
«Հիմնական խնդիրը մենք տեսնում ենք գաղափարական հողի վրա: Եկեղեցին համոզված է՝ ներկայացված չափորոշիչներով չենք կարող պատրաստել այնպիսի քաղաքացի, որը պատրաստ կլինի իր գիտելիքներով եւ հմտություններով դիմագրավել երկրի եւ ժողովրդի առաջ ծառացած մարտահրավերներին: Մեր պես երկրների համար, որոնք շրջապատված են ոչ բարեկամ երկրներով եւ ունենք ինքնության պահպանման խնդիր, շատ կարեւոր է ազգային նկարագրի եւ ինքնության պահպանումը՝ սերնդի կրթության, հոգեւոր մտածողության համար»,-համոզմունք հայտնեց հայր Զաքարիան:
Նա շեշտեց՝ չափորոշիչներում որպես առաջնահերթություն են հռչակված բնագիտական առարկաները, օտար լեզուների իմացությունը, ժամանակակից տեխնոլոգիաների տիրապետումը. «Սա իսկապես շատ լավ է, բայց մեր դիրքորոշումն այն է, որ այս ամենը չպետք է լինի հայագիտական առարկաների հաշվին: Եկեք խոստովանենք, որ հայագիտական առարկաներով է մարդը ձեւավորում իր ինքնությունը՝ լեզվով, պատմությամբ, գրականությամբ: Մեր առաջարկն էր, որպեսզի հայագիտությունը եւս հռչակվի գերակա ուղղություն: Մեզ համար մտահոգիչ են նաեւ «Հայոց պատմություն» առարկայի հետ կապված խնդիրները, այդ թվում՝ ժամերի, ժամանակագրական խեղաթյուրումների վերաբերյալ: Փաստերով ենք ցույց տվել, որ խնդիր ունենք»:
Կարդացեք նաև
Հայր Զաքարիայի խոսքով՝ բարեփոխումները շատ լավն են, եթե միտված եւ հայի կերպարի հզորացմանը. «Պատրաստելով «համաշխարհային քաղաքացու» գաղափարը՝ դա գուցե այլ երկրների համար է, բայց ոչ մեր: Մենք ինքնության խնդիր ունենք: Կարծում եմ՝ չափորոշիչներով չենք կարող պատրաստել մի մարդու, որն ամեն ինչով կապված կլինի իր հայրենիքի հետ: Հակառակը, նա կարող է ամեն տեղ ապրել: Այսինքն, չենք պատրաստում ՀՀ քաղաքացի, այլ անձ, որն ունի որոշակի գիտելիքներ: Եկեղեցին չի ընդդիմանում, որովհետեւ դրված է «Հայ եկեղեցու պատմություն» առարկայի տարրալուծման խնդիրը, այլ որովհետեւ մենք ունենք համոզմունք՝ այս ձեւով կրթական բարեփոխում կատարելը ճիշտ չէ: Հավելեմ, որ քննարկում չի եղել Մայր աթոռի հետ: Նման կերպ առարկան հանելը ճիշտ չէ, այս ամենն իսկապես մտահոգիչ է»:
Լուիզա ՍՈՒՔԻԱՍՅԱՆ
