Տավուշի մարզի բնակչության հետ հանդիպման ժամանակ ԲՀԿ նախագահ Գագիկ Ծառուկյանը անդրադարձավ նրանց հուզող խնդիրներին, օրեցօր ավելացող դժգոհությանը՝ նշելով, որ առանց այն էլ համավարակից տուժած մարդկանց տուգանելու փոխարեն՝ անհրաժեշտ է ստեղծված իրավիճակից դուրս գալու պայմաններ ստեղծել:
«Սիրելի ժողովուրդ, իմ անձնական շահի համար չէ՝ պետության, ժողովրդի եւ իմ երեխաների ապագայի համար է: Իմ ժողովուրդը պետք է լավ լինի, որ իմ երեխան էլ իրեն լավ զգա: Մի մարդով լավ լինել չի կարող: Սահմանամերձ գոտի է, ծանր վիճակ է, մարդիկ տոկոսի, պարտքի տակ են: Եկել եմ՝ ասեմ. ժողովուրդ ջան, ինչի՞ կարիք կա այսօր ձեր համայնքում, ասեք՝ օրինակ ծառայեմ, խոսքս գործ դարձնեմ: Սա է իրականությունը, ոչ թե գան մարդկանց վախեցնեն, տոկոսներ ավելացնեն»,-հավաքվածներին դիմեց նա:
Գագիկ Ծառուկյանն այստեղ էլ հետաքրքրվեց, թե քանի՞ մարդ է տոկոսի տակ, կորոնավիրուսի հետ կապված ստուգումների, դեղորայքի հարցում աջակցություն ստացողներ կա՞ն: Եվ բացասական պատասխան ստանալով՝ ասաց. «Բա ի՞նչ են այսօր եկել ոստիկանությունով մարդկանց վախեցնում, ճանապարհները փակում: Լավ, դրանով ի՞նչ է լինում, մի քիչ էլ ձգեք՝ ի՞նչ է լինելու:
Պետությունը պետք է լինի ժողովրդի կողքին, մինչեւ մարդիկ հնարավորություն ունենան աշխատել: Ես այսօր ոչ մի բանի կարիք չունեմ, անձնական հարց լուծելու խնդիր չունեմ: Առաջին օրվանից ասել եմ՝ անփորձ երիտասարդներ են, չեն կարողանում արդյունավետ աշխատել, բյուջեի գումարները ճիշտ նպատակներին ծառայեցնել: Թոշակը 2000 դրամով են ավելացրել, բայց մնացած հարկ ու տուրքը 10 անգամ են ավելացրել»:
Կարդացեք նաև
Աշոտ ՀԱԿՈԲՅԱՆ
