«Ո՛չ հնի վերադարձին», «Եղեգնուտն առանց թալանի» ցուցապաստառներով այսօր Արմավիրի մարզի Եղեգնուտ համայնքի բնակիչները կառավարության առաջ էին: Եղեգնուտցիները չեն համակերպվում դատարանի այն որոշմանը, որ նախկին համայնքապետ Ռազմիկ Մարգարյանը վերականգնել է լիազորությունները եւ կրկին ղեկավարում է համայնքը:
Հիշեցնենք, որ Ռազմիկ Մարգարյանը հրաժարական էր ներկայացրել 2018 թվականին՝ երկրում տեղի ունեցած հեղափոխությունից հետո՝ եղեգնուտցիների պահանջով:
Residents of Yeghegnut village hold a protest action in front the RA Government’s building
Ինչպես ցույցին մասնակից գյուղացիները նշեցին, Արմավիրի մարզպետը չի կարողանում հարցը լուծել, այդ պատճառով էլ հասել են վարչապետի նստավայր: Նրանք պահանջում եմ պաշտոնանկ անել նախկին համայնքապետին եւ նոր ընտրություններ նշանակել՝ հակառակ դեպքում չեն դադարեցնի բողոքի ցույցերը:
Եղեգնուտցիների խոսքով, արդեն քանի ամիս է գյուղի անդորրը խաթարված է. բնակիչները թույլ չեն տալիս, որ գյուղապետարանն աշխատի: Ռազմիկ Մարգարյանն էլ դեղատան շենք է վարձակալել, նոր կնիք է հանել ու փորձում է համայնքը ղեկավարել:
Կարդացեք նաև
«Մի գյուղն ունի մի քանի գյուղապետարան, գյուղացիների գործերը կանգնած են, եթե այսպես շարունակվի ու քայլեր չձեռնարկեն՝ հնարավոր է կտրուկ քայլերի գնանք, անգամ մարդասպանություն լինի»,-սպառնացին գյուղացիները: Նրանք վրդովված թվարկեցին այն խնդիրները, որոնք նախկին գյուղապետի օրոք համայնքն ունեցել է՝ 30 տարի որդնած ջուր են խմել, անբարեկարգ ճանապարհներով երթեւեկել, գյուղը մթության մեջ կորած է եղել, զոհված ազատամարտիկների անունով 1 միլիոն դրամ է դուրս գրվել ու մի լումա անգամ չի ծախսել այդ նպատակով: Ռազմիկ Մարգարյանի այդ արարքն, ըստ բնակիչների, ոստիկանության 6-րդ վարչությունն է բացահայտել եւ այդքանից հետո նախկին գյուղապետը չի լքում պաշտոնն իսկ մարզպետը «ձեռքերը լվացել՝ մի կողմ է քաշվել»:
Հիշեցնենք, որ այս առիթով Արմավիրի մարզպետարանը հայտնել էր, որ օրինական ուժի մեջ մտած դատական ակտը չկատարելն առաջացնում է օրենքով նախատեսված պատասխանատվություն ինչպես պետական, այնպես էլ տեղական ինքնակառավարման մարմինների պաշտոնատար անձանց համար:
Residents of Yeghegnut village hold a protest action in front the RA Government’s building
Եղեգնուտում համայնքապետի նոր ընտրությունները նախատեսված են 2021 թվականի աշնանը, սակայն բնակիչները անգամ մեկ օր չեն ուզում նախկին գյուղապետի պաշտոնավարման տակ ապրել. «Մեզ համար անհասկանալի է՝ ինչո՞ւ են ՀՀԿ-ական կոռուպցիոներին հետ բերել: Եթե 34 տարվա թալանչուն հետ են բերում՝ Արմավիրի մարզը տանուլ է տալիս հեղափոխությունը: Մենք պահանջում ենք նոր ընտրություններ: Համայնքի բնակիչները դեմ են նրան, չենք ուզում ու վերջ: 600 եւ ավելի ստորագրություն ներկայացրել ենք պարոն Փաշինյանին, մի՞թե նրան խնդիրը ճիշտ չեն ներկայացնում»:
Եղեգնուտցիների ցույցի էին եկել մեծով ու փոքրով:
Լուսինե ԲՈՒԴԱՂՅԱՆ
