Մանդատը վայր դնելու մասին ԱԺ պատգամավոր Արսեն Ջուլֆալակյանի հայտարարությունը խմբակցության պատգամավորների համար անակնկալ է եղել: Նրա հետ նույն՝ ԱԺ Գիտության, կրթության, մշակույթի, սփյուռքի, երիտասարդության եւ սպորտի հարցերի մշտական հանձնաժողովում ընդգրկված պատգամավոր Արթուր Մանուկյանը մեզ հետ զրույցում ասաց, որ մեծ ցավ է իր համար, որ Ջուլֆալակյանը նման որոշում է կայացրել:
Ավելին՝ պատգամավորը վստահեցրեց, որ եթե անհրաժեշտ լինի՝ կխնդրի հանձնաժողովում կամ խմբակցությունում նրա մասնակցությամբ նիստ հրավիրել, խնդրել, որ հետ կանգնի մանդատը վայր դնելու քայլից. «Տարաձայնություններ բոլորս էլ ունենում ենք, բայց ես դրանց նայում եմ որպես աշխատանքային պրոցես: Անհնարին է, ո՞նց կրող ես տարաձայնություն չունենալ, նույնիսկ ամենամտերիմ մարդիկ նույն գործը անելիս ունենում են տարաձայնություն: Ես շատ եմ ցավում, որ այսպես է լուծումը գտնվել:
Ես շատ ուրախ եմ, որ կա ուրիշ կարծիք եւ այս տարաձայնությունների, փաստարկների դաշտում մենք կգտնենք լավագույն լուծումը: Ինձ համար սա ուրախալի բան է, ոգեւորող է: Իսկ մանդատը դնելը լրիվ ուրիշ բան է»:
Հարցին, թե այդ դեպքում ինչը կարող է պատգամավորին հասցնել մանդատից հրաժարվելուն՝ դերասան-պատգամավորը նկատեց. «Ողջամիտ չէ, որ բոլորը ամեն ինչում համաձայն լինեն: Իհարկե, խոսում ենք, քննարկում ենք, փաստարկում ենք, համաձայնում ենք, չենք համաձայնում այդպես էլ, բայց մանդատը դնելը շատ ծանր քայլ է: Ցավում եմ այդքան բանիմաց, գրագետ պատգամավոր կորցնելու կապակցությամբ»:
Կարդացեք նաև
Սյուզաննա ՊՈՂՈՍՅԱՆ
Հոդվածն ամբողջությամբ՝ «Հայկական ժամանակ» օրաթերթի այսօրվա համարում:
