Այսօր կառավարության առջեւ էին նաեւ մի խումբ տնտեսվարողներ, որոնք բողոքում էին մաքսային վճարների նոր կարգից: Նրանց պնդմամբ, մաքսազերծման գինը նոր կարգով 6 անգամ բարձրանում է, ինչը մեծ վնաս է հասցնելու բիզնեսին: Մինչ այդ, բիզնեսի ներկայացուցիչներին վստահեցրել էին, որ ոչ բրենդային ապրանքների մաքսազերծման գինը շատ քիչ է բարձրանալու կամ ընդհանրապես չի բարձրանալու։ Երեկ սակայն գործարարները տհաճ անակնկալի են հանդիպել, երբ հասկացել են, որ ներմուծվող ապրանքների մաքսազերծումը մի քանի անգամ թանկացել է: ՊԵԿ-ի այն բացատրությանը, թե կիրառում է հսկիչ գներ, տնտեսվարողները հակադարձում են՝ հսկիչ գների ամենաբարձր սանդղակով են մաքսազերծման գին սահմանում։
Այսօր ցույցի մասնակիցներն ասացին, որ երեկ հանդիպել են ՊԵԿ-ի ղեկավարի տեղակալին ու լսել նրա բացատրությունները:
«Մենք խնդրում ենք, որ 1 տարի գործի նախկին կարգը՝ մինչեւ հասկանան՝ ինչ է լինում: Հիմա համաշխարհային տնտեսությունը կաթվածահար վիճակում է, անորոշ է՝ ինչ է լինելու: Ես Չինաստանից ապրանք եմ գնել, դեռ այդ քաղաքը փակ է, չգիտենք երբ կբացվի, ապրանքը երբ կհասնի: Անորոշ վիճակի մեջ մի հատ էլ անորոշություն են մտցնում: Կարող է հոկտեմբեր ամսին նորից փակվի ու հենց հիմա՞ պետք է արվի, երբ այսպիսի իրավիճակ է»,-դժգոհում էին տնտեսվարողները: Նրանց խոսքով, բանակցություններից հետո որոշակի փոփոխություն հօգուտ գործարարների եղել է, սակայն անգամ այդ երկու անգամ մաքսի բարձրացումը գործարարի համար զգալի է եւ նշանակում է ապրանքը 20 տոկոսով թանկանալու է:
Գործարարները նաեւ անհասկանալի են համարում ՊԵԿ պաշտոնյայի այն բացատրությունը, որ մաքսային վճարի բարձրացումը պայմանավորված է ԵԱՏՄ կանոնակարգերով: Նրանք հարցնում են՝ իսկ ինչո՞ւ Ռուսաստանում այդ նույն պահանջը չի գործում Չինաստանից եւ Թուրքիայից ներկրված ապրանքի վրա եւ այդ երկրում կիլոգրամով են մաքսազերծում՝ ինչպես մեզ մոտ էր:
Կարդացեք նաև
Լուսինե ԲՈՒԴԱՂՅԱՆ
