Ես այսօր չեմ տեսնում մոտակա ժամանակներում հայ-ադրբեջանական հակամարտության լուծման որեւէ տարբերակ, «Հաղթանակած» նախաձեռնության ճամբարում երիտասարդների հետ հանդիպման ժամանակ ասել է ՀՀ երկրորդ նախագահ Ռոբերտ Քոչարյանը: «Ադրբեջանական կողմը ժխտում է վերջին 30 տարվա իրողությունը: Մենք չենք կարող կայացած փաստերը հաշվի չառնել: Ղարաբաղի փաստը կա, Ղարաբաղի ստեղծման իրավական հիմքերն անխոցելի են: Օրեր առաջ Ղարաբաղի 29-ամյակն էր: Ղարաբաղում արդեն երկու սերունդ է մեծացել այն համոզմունքով, որ նոր պետություն են կառուցել եւ այդ պետության քաղաքացիներն են: Դու չես կարող նրանց ասել, սա չի եղել, հիմա հետ ենք գնում», -ասել է Քոչարյանը: Ըստ նրա, քանի դեռ Ադրբեջանը չի հասկացել այս պարզ ճշմարտությունը, առաջ գնալու տարբերակ չկա:
Ռոբերտ Քոչարյանի կարծիքով, պետք է տրամադրվել, որ այս վիճակը երկար է տեւելու, եթե հաջողվի արագ լուծում գտնել՝ ավելի լավ: Իսկ դիմակայելու համար հակառակորդը պիտի հասկանա, որ հարցը չի լուծելու ռազմական ճանապարհով: Իսկ դրա համար մեզ պետք է հզոր բանակ, դինամիկ զարգացող տնտեսություն, ինքնության մեջ ազգային հզոր բաղադրիչ, վստահ է Քոչարյանը:
Նելլի ԳՐԻԳՈՐՅԱՆ
