«Դռնփակ ռեժիմում քննարկվածը ենթակա չէ հրապարակման: Բավականաչափ ծավալուն քննություն կատարվեց, դատարանն էլ հավելյալ ուսումնասիրություններ անելու անհրաժեշտություն տեսավ, քանի որ փաստաթղթեր են ներկայացվել»,-լրագրողների հետ զրույցում այսօր ասաց Ռոբերտ Քոչարյանի պաշտպան Արամ Վարդեւանյանը:
Հիշեցնենք, որ «Մարտի 1-ի» մայր գործի շրջանակում ՀՀ սահմանադրական կարգի տապալման համար մեղադրվողներ ՀՀ երկրորդ նախագահ Ռոբերտ Քոչարյանի, գլխավոր շտաբի նախկին պետ, 2008թ.-ի դրությամբ՝ Երեւանի կայազորի պետ Յուրի Խաչատուրովի, պաշպանության նախկին նախարար, 2008թ.-ի դրությամբ՝ ԶՈՒ ԳՇ պետ Սեյրան Օհանյանի, նախկին փոխվարչապետ Արմեն Գեւորգյանի գործով հերթական դատական նիստում այսօր Ռոբերտ Քոչարյանի պաշտպանական թիմը միջնորդել էր դռնփակ նիստում քննարկել Քոչարյանի գույքը կալանքից ազատելու իրենց միջնորդությունը: «Նիստը նշանակվել է առաջիկա երեքշաբթի՝ 13:00-ին: Պահանջն այն է, որ գույքի եւ դրամական միջոցների վրա դրված արգելանքը վերացվի, քանի որ ՀՀ եռաստիճան դատական համակարգի կողմից այն ճանաչվել է որպես իրավունքի խախտում»,-նշեց Արամ Վարդեւանյանը:
Լուիզա ՍՈՒՔԻԱՍՅԱՆ
