«Դիմակ չեմ կրել ու չեմ կրելու: Միշտ չեմ կրել: Այսօր արդեն երկու անգամ տուգանվել եմ»,-դատարանի առաջ այսօր հայտարարեց Ռոբերտ Քոչարյանի աջակիցներից Նարեկ Մանթաշյանը:
Հիշեցնենք, որ ՀՀ սահմանադրական կարգի տապալման համար մեղադրվող Ռոբերտ Քոչարյանի եւ մյուս պաշտոնյաների գործով հերթական դատական նիստն է այսօր:
«Պատրաստվում եմ անընդհատ տուգանվել, որովհետեւ սա ապօրինի է: Ես ունեմ առողջական խնդիրներ եւ չեմ պատրաստվում տեղեկանք ման տալ անընդհատ հետս իմ երկրում եւ իմ հիվանդությունը որպես կարմիր թել անցկացնեմ կյանքիս բոլոր շրջափուլերում: Ես տուգանվեցի, եւ այս ապօրինի գործողությունները վիճարկելու եմ դատարանում: Ոստիկաններն առանց ախտահանվելու վերցնում են անձնագիրս, հետո՝ ինձ վերադարձնում: Սա անվտանգ միջանձնային հարաբերություն չէ»,-նշեց Նարեկ Մանթաշյանը:
Քոչարյանի աջակիցները բողոքում են կորոնավիրուսի դեմ պայքարում իշխանության գործողություններից: «1178 մահերի համար պատասխանատու է իշխանությունը՝ անգործության համար: Չի ապահովվել ժողովրդի անվտանգությունը, ինչի հետեւանքով այսքան մահ ունենք: Ոստիկանության եւ տուգանքի միջոցով իշխանությունն ուզում է վերջին լուման ժողովրդից վերցնել: Նրանք իշխանության են եկել՝ գրպանները լցնելու համար: Նիկոլ Փաշինյանին բերման ենթարկեք, հարգելի ոստիկաններ: Ապօրինի վարչապետի պահանջը մի կատարեք»,-հայտարարեց Նարեկ Մանթաշյանը:
Կարդացեք նաև
Ոստիկանությունը նրան հինգ րոպե ժամանակ էր տվել՝ դիմակ դնելու համար: Նա բերման ենթարկվեց:
Լուիզա ՍՈՒՔԻԱՍՅԱՆ
