«Ընկերությունն իր ողջ պատմության ընթացքում կա՛մ աշխատել է վնասով, կա՛մ չնչին շահույթով 1.5-2 տոկոս, ընդամենը 2019 թվականին է ընկերությունն իր շահույթը բարձրացրել 20 տոկոս»,-այսօր Երեւանի ավագանու նիստում ասաց Արաբկիր վարչական շրջանի ղեկավար Արամ Դանիելյանը` ներկայացնելով Երեւանի «Արաբկիր նախագիծ» ՓԲԸ-ի լուծարման ավագանու որոշումը: Նա նշեց, որ Արաբկիր նախագիծ ՓԲԸ-ն հիմնադրվել է 2009-ին եւ 2011 թ.-ի ավագանու որոշմամբ կառավարման լիազորությունները պատվիրակվել են վարչական շրջանի ղեկավարին: Ըստ Արամ Դանիելյանի, ընկերությունը հիմնականում զբաղվել է նախագծային եւ նախահաշվային աշխատանքների կատարմամբ. «Ընկերության աշխատավարձային ֆոնդը քիչ է նախատեսված եղել եւ որեւէ որակյալ ճարտարապետ չէր համաձայնի աշխատել այդ աշխատավարձով, որը հարկերը ներառյալ՝ 130 հազար դրամ է կազմում, մինչդեռ ճարտարապետի առկայությունը պարտադիր է եղել ընկերությունում»։
Ըստ պարոն Դանիելյանի, ընդհանուր բաժնետիրականության մասին օրենքով, երբ բաժնետիրական ընկերությունը 2 կամ ավելի տարիներ իր կանոնադրական կապիտալի նկատմամբ բացասական ցուցանիշներ է ցույց տվել՝ օրենքի ուժով պարտավոր է գնալ լուծարման:
Արաբկիր վարչական շրջանի ղեկավարը նաեւ տեղեկացրեց, որ ընկերությունը մասնավորին վաճառելու մտադրություն է եղել, սակայն նրա գործունեության հետ կապված կան իրավական խնդիրներ՝ քրեական գործ է հարուցվել տնօրենի կատարած աշխատանքների վերաբերյալ. «Ընկերությունը հունվարից 2 աշխատակից ուներ՝ տնօրեն եւ հաշվապահ եւ նրանց աշխատավարձերը, հարկային պարտավորությունները եւ դրանք չկատարելու պատճառով առաջացող տոկոսները բեռ են Երեւան համայնքի վրա ու նպատակահարմար է լուծարել եւ օր առաջ գործունեությունը դադարեցնել»:
Արամ Դանիելյանը՝ հավաստիացրեց, որ ընկերության աշխատողներին տեղավորել են այլ աշխատանքի:
Կարդացեք նաև
Ավագանին լուծարման որոշման դեմ չառարկեց եւ միաձայն ընդունեց:
Լուսինե ԲՈՒԴԱՂՅԱՆ
